La emigración xestiona 91 centros asturianos

Guillermo Martínez aconceyó con Manuel de Barros, presidente de la Federación Internacional de Centros Asturianos (FICA).

Anguaño hai 91 centros asturianos activos en tol mundu, de los que 29 tán nel Estáu. El continente que sigue teniendo una mayor presencia ye América, con 52 coleutivos d'emigrantes, siguíu d'Europa, con 6; Asia, con 3; y Australia, con 1. A esta llista hai que sumar a la propia FICA y a la Federación d'Asociaciones de Cuba, que también tienen reconocida la declaración d'asturianía.

El conseyeru de Presidencia y Participación Ciudadana treslladó a De Barros, nuna reunión na que tamién taben presentes la direutora xeneral d'Emigración, Begoña Serrano, y la presidenta del Conseyu de Comunidaes Asturianes, Paz Fernández Felgueroso, que'l Gobiernu incrementará esti añu un 16 por cientu'l presupuestu destináu a los centros y cases asturianes, hasta situalo en 140.000 euros. La partida global en materia d'emigración elévase a 1,3 millones, un 7,3 por cientu más que nel 2016.

Llei d'Asturianía

Nel alcuentru tanto Martínez como De Barros coincidieron na necesidá d'entainar la tramitación del proyeutu de Llei d'Asturianía, que'l Conseyu de Gobiernu aprobó'l 21 de mayu y que ta pendiente de tramitación na Xunta Xeneral. La normativa, que recueye la realidá nueva del fenómenu migratoriu, ta orientada a garantizar a les personas emigrantes y retornaes l'exerciciu de los sos derechos nes mesmas condiciones que los residentes n'Asturies o n'otros territorios del Estáu.

Tamién define conceptos como asturianía y lo que s'entiende por comunidaes asturianes, al tiempu que determina les obligaciones y deberes de los poderes públicos frente a les coleutividaes nel esterior.