La emigración en Venezuela ensin seguru recibe más ayudes pa tener atención sanitaria

|
Fundación Centro Asturiano de Caracas

El Gobiernu robla un conveniu cola Fundación Centro Asturiano de Caracas pa desarrollar un programa d'asistencia a la coleutividá asturiana residente nel país sudamericanu.

Gracies a esti alcuerdu van destinase 10.000 euros pa emprestar asistencia d'atención primaria en medicina xeneral, oftalmoloxía y odontoloxía a les persones emigrantes asturianes residentes en Venezuela y los sos descendientes qu'escarezan de seguru médicu y que pelos sos medios nun puedan cubrir les necesidaes básiques. Ésti súmase al firmáu en mayu cola Fundación España Salud de 200.000 euros pa un programa d'ayuda d'emerxencia a la emigración asturiana pa garantizar cobertoria sanitaria y farmacolóxica a persones de menos de 65 años en situación de gravedadá estrema, dalgo que yá s'ufría a mayores, y facilitar l'accesu d'alimentos a les families con recursos escasos.

La intención ye qu'esta ayuda nueva vaya acompañada d'una campaña de divulgación y promoción de tolos programes solidarios entamaos pol Gobiernu en Venezuela pa emigrantes. Según los datos oficiales últimos, 5.224 persones componen la coleutividá asturiana nesti país, de los que casi 2.000 tienen más de 65 años.

Contador Estadistiques