La emigración de la mocedá centró la manifestación d’ayeri en Xixón

Caxes de muertu nes que podíen lleese frases como "RIP Asturies" y maletos cola sentencia "oblíguenme a marchar" dieron-y color -negru- a la manifestación que convocaron ayeri en Xixón los sindicatos CSI y SUATEA y a la que s'amestaron colectivos políticos y sociales de toa triba, dende los afectaos pola reforma del Plan d'ordenación urbana hasta los prexubilaos de la Camocha pasando per fuercies asturianistes como Andecha Astur o IAS y grupos como'l Fondu de Solidaridá FUSOA y colectivos d'inmigrantes. La manifestación tuvo chiscada de toques antroxeros, casu d'una furgoneta de cartón sonsañando les de la policía qu'acabaron quemando simbólicamente los manifestantes.


Baxo'l llema "Contra'l desmantelamientu d'Asturies" la marcha atravesó'l centru de Xixón hasta llegar a la plaza l'Ayuntamientu, onde Juan Manuel Martínez Morala pola CSI y Mauite Rivas pol SUATEA lleeron los comunicaos oficiales de les dos organizaciones convocantes.


El primeru fizo un durísimu repás a la situación llaboral d'Asturies, esponiendo los problemes que se viven nes principales empreses del país y criticando sobremanera a les centrales sindicales mayoritaries pola so política de collaboración col executivu arecista y cola patronal FADE, faciendo referencia esplícita al Alcuerdu pal Desarrollu económicu, la Competitividá y l'Emplegu n'Asturies, qu'un añu dempués nun ufierta pa la CSI más resultaos que despidos, reconversión y pieslle d'empreses. Morala abrió dacuando la intervención a otros temes d'importancia social ente los que'l veteranu sindicalista mencionó la situación de la llingua asturiana y pidió que como midida urxente pa torgar no posible la migración de la mocedá s'aplique cuanto primero'l salariu social a falta d'otres midíes de más fondura.

Pela so parte, Maite Rivas, del SUATEA, dio un discursu n'asturianu y de clave asturianista, nel que condenó la falta d'enfotu por "construyir país" del executivu asturianu y afondó na idea del desmantelamientu d'Asturies, esponiendo los sos efectos nel sector de la enseñanza, con una despoblación que ta escosando les escueles. Maite Rivas sorrayó qu'esta crisis de despoblación ta acusándose enforma na escuela rural, que ta desapaeciendo especialmente nes ales, en cuantes que la población asturiana ta concentrándose nel área central. La sindicalista denunció la política del Gobiernu asturianu qu'entiende que potencia los conciertos educativos con empreses particulares y criticó la inestabilidá del profesoráu asturianu, denunciando qu'esiste una tasa d'interinos de más del 10% sobre una plantiya de cerca de 12.000 persones.


Dambes organizaciones convocantes de la marcha concueyaron n'apuntar que vamos camín n'Asturies d'un nuevu marcu de rellaciones llaborales nel qu'instrumentos como los convenios colectivos van pasar a la historia, metiéndonos per un nuevu marcu de rellaciones llaborales ensin compromisos per parte de les empreses y que va ser mui inxustu, especialmente dende una perspectiva de xéneru.

SUATEA y CSI, anque pendientes d'una valoración definitiva, declararon tar mui contentos del resultáu de la manifestación, peritando en más de 4.000 persones la cifra d'asistentes, y dan anuncia de que la d'ayeri foi la primer actividá d'una campaña de protestes contra'l desmantelamientu d'Asturies que van siguir d'equí en p'alantre. L'ún de mayu apaez como la próxima cita nel so calandariu.
Ver galería de semeyes