La economía europea nun crez

L´estancamientu de la economía nos países de la Xunión Europea ya ye una realidá que tolos díes demuestren los permalos datos macroeconómicos del Vieyu Continente. L´anuncia la pasada selmana de que la locomotora europea, Alemaña, nun medra, sinon que ta nuna perimportante recesión, ye bona semeya de les perspectives económiques na Europa comunitaria.



Nel segundu trimestre d´esti añu el PIB d'Alemaña cayó un 0,1% lo que supón entamar oficialmente una dura recesión económica. Los dos trimestres anteriores el PIB de la primer potencia económica europea cayó un 0,2% y un 0,003%. Según los economistes un país entama una recesión cuando tien cayíes del so PIB en dos trimestres consecutivos, y Alemaña. Yá ta nel terceru. A la yá feble economía alemana dañola la probetaya situación del sector esportador, y anque la demanda del consumu interior medró dalgo nos últimos meses, ello nun foi abondo pa caltener una economía con altes tases de paru y con unes empreses con altes perdes de competitividá nos mercaos internacionales. Énte esti panorama, el Gobiernu Alemán quier entamar un programa de baxada d´impuestos y caltener un crecimientu económicu pa esti añu del 0,75%.

El casu ye que les esportaciones y les empreses alemanes representen penriba de la mitada del potencial económicu de la Xunión Europea, polo que si Alemaña va mal, el restu nun van dir meyor. Y asina ye, porque Holanda y Italia tamién tan en recesión económica. El PIB italianu cayó un 0,1% nos dos primeros trimestres d´esti añu. El país de los tuilpanes nun lo llevó meyor, y el PIB baxó-y un 0,5% en te abril y xunetu dempués d´unes cayíes del 0,3% y 0,2% nos trimestres anteriores. Otramiente les economíes de Portugal y Francia anden mui xustes, compartiendo toes elles un mesmu marcu de baxu consumu, xorrecimientu del desempléu, baxada de les esportaciones y cayida de les inversiones.

A la Comisión Europea nun-y prestaron un res estos datos énte la posibilidá d´una recesión total na Xunión Europea. De fechu, el crecimientu interanual del PIB de la Xunión Europea nel so conxuntu baxó del 0,9% al 0,4%. Nel casu d´Asturies, el consumu ta baxando mentantu que´l país sigue ocupando los últimos puestos de toles estadístiques económiques, cosa que nun ye novedá nenguna.