La economía asturiana nun esconsona

La Sociedá Asturiana d'Estudios Industriales (SADEI) ta acabante de presentar l'informe de coyuntura de la economía asturiana que correspuende a febreru del 2.003. Según Sadei, la economía asturiana siguió en febreru la llínia d'esmorecimientu d'otros meses meses, anque con un pequeñu repunte al alza.

Ente los datos más importantes del informe, Sadei solliña l'espoxigue de la construcción, xubiendo'l 17,9% la venta de cementu, mientres que'l sector industrial marcó cifres discretes, baxando l'ídiz de Producción Industrial d'Asturies el 5,4%. Nel sector servicios les pernoctaciones n'establecimientos hoteleros
baxaron el 4,5%

Tamién hai datos atípicos, casu del subsector pesqueru, onde les rules d'Avilés y Xixón rularon un 18,5% más en pesu de pescáu, pero hai que tener en cuenta qu'esto foi cuando los demás caladeros de la costa cantábrica taben trancaos pola crisis del Prestige mientres que los asturianos siguieron abiertos. Nel sector primariu l'agricultura pasó un mes discretu a cuenta de la parada vexetativa invernal, mientres que'l sector llecheru acusó crisis con un 9,6% menos de lleche recoyío.

Los datos del mercáu llaboral foron más positivos, baxando'l paru un –0,8%(–479 persones) y con bien d'afiliaciones a la Seguridá Social (+2.023 persones). Nesti particular Sadei alvirtió que'l mes de febreru suel marcar l'entamu del ciclo añal positivu pal mercáu de trabayu asturianu. P'acabar, el consumu nun acaba d'esconsonar, y un datu significativu nesti sentíu son les ventes de coches, que baxaron el 7,6%.