La draga va camín de Vidíu

El Ministeriu de Fomentu y Costes siguen cola intención de
sacar d'enfrente del cabu l'arena pa la playa de Salinas dempués de que
nun se llegare a un alcuerdu coles cofradíes de pescadores. La draga va
camín de Vidíu y Fomentu ta acabante d'espublizar una orde
prohibiendo la navegación nel llugar énte la posibilidá de
que les cofradíes llevaren los barcos hasta'l llugar en protesta pa
torgar la obra.



Costes nun pudo llegar finalmente a un alcuerdu económicu colos
pescadores asturianos pa sacar los cerca de 500.000 metros cúbicos
d'arena colos que se cuenta rellenar de sable la Playa de Salinas, según
el proyectu que lleva colingando dende va cuatro años pelos despachos
del ministeriu y que ta paralizáu dende l'añu 2003 pola
oposición de los pescadores de toles cofradíes. De nun entamar la
obra enantes del 31 d'avientu, perderíase una subvención de 9
millones d'euros que concedió la UE al proyectu de rexeneración
de la Playa de Salinas, afectada va años d'una perda d'arena que Costes pretendió
iguar con arena del caladeru d'enfrente de Cuideiru, llugar de pesca de calamar
y d'otres especies mui apreciáu polos pescadores



Énte esta situación, Costes garró la iniciativa nel asuntu. Perdida la negociación,
Costes tenía mui claro que quería sacar la obra alantre, polo qu'ordenó'l
desplazamientu de la draga dende Holanda, una decisión que
provocó la rempuesta inmediata de les cofradíes de Cuideiru,
qu'alvirtieron qu'en llegando la draga ellos diríen colos sos barcos a
torgar el llabor dela máquina. L'últimu pasu dientro de la xuba
de tensión ta acabante de dalu'l Ministeriu de Fomentu, que
prohibió ayeri xueves pela tarde la navegación na parte de
Vidíu por un plazu d'un mes con motivu de la llegada de la draga y la
realización de la obra. La cofradía de Pescadores d'Avilés
yá punxo recursu contra la orde de Fomentu, y los pescadores van decidir
güei n'Ouviñana les midíes a adoptar.