“La diversidá ye un patrimoniu, enxamás un peligru”, diz Rubiera

“Defendamos la nuesa cultura y la nuesa llingua”, encamentó Pilar Rubiera nel XLII Día de les Lletres Asturianes. La periodista, académica d’honor nueva, defendió la oficialidá del asturianu y afirmó qu’en 40 años n’Asturies “nun se fixo una política llingüística clara y decidida pa garantizar la so sobrevivencia”.

“A lo llargo del tiempu tuvi nesti actu la mayoría de les vegaes como periodista y n’otres ocasiones como ciudadana implicada na defensa de la llingua. Facelo güei como académica d’honor ye un privilexu y do-y les gracies a toles persones que d’un mou o otru m’enseñaron a amar al asturianu y quixeron que güei tea nesti queríu escenariu del Campoamor”, entamó Rubiera na so intervención, na que recordó que nel mundu “hai unes 5.000 llingües, hasta va poco yeren 20.000, y Asturies tien una”.

Sicasí, apuntó que de los 300.000 falantes qu’afiten los estudios sociollingüísticos “munchos tán morriendo, tenemos a polos menos dos xeneraciones de mozos pel mundu, colo qu’esto significa de distanciamiento del país d’orixe, y la llingua nun ta afitada na normalidá ciudadana. Y toos sabemos que la comunicación oral ye l’oxetivu cimeru d’una llingua. Y una llingua ye un paisaxe únicu, ye nuesa, ye lo qu’heredamos de los nuesos mayores, forma parte de la cultura de nueso, descríbenos, retrata’l nuesu mundu”, añadió.

Como periodista, Rubiera pudo conocer les dificultaes del asturianu nos caberos 40 años, “y tengo bien claro que la diversidá ye un patrimoniu, enxamás un peligru”. “Entrúgome entovía güei cómo ye posible que dalgunos asturianos renieguen d’un elementu cultural que nos fai esceicionales. Nun conozo nengún territoriu nel que los sos responsables políticos refuguen, como lo fixeron y entovía lo faen dalgunos, esta realidá. Utilizóse la llingua como arma contra los demás, como ferramienta de división, ensin entender el so enorme valir, non sólo cultural”, llamentó darréu.

El movimientu más importante de la segunda metá del sieglu

Nel so discursu la uvieína, que desendolcó la so trayeutoria profesional nel diariu 'La Nueva España', confesó que “tuvi grandes maestros n’asturianía o asturianismu a lo llargo de la mio vida”, de los que rescampló trés: María Josefa Canellada, Pepe El Ferreiro y Pablo Ardisana. Llueu recordó l’entamu de Conceyu Bable, apuntando que la manifestación del 1976 “foi l’iniciu del movimientu cívicu de reivindicación llingüística n’Asturies, na mio opinión, el movimientu cultural más importante de la segunda metá del sieglu XX nel nuesu Principáu”.

De l’Academia de la Llingua Asturiana recampló la so “xera d’estudiu y ellaboración de les ferramientes de la llingua, que foi y ye almirable” nel entamu a un repasu d’esos años hasta la Llei d’Usu y la situación d’anguaño. Un momentu nel que, opina, “la llingua tien una escasa visibilidá, a nun ser nel mediu rural”.

“¿Quier dicir que l’asturianu ta muertu? Non, quier dicir que nun se fexo una política llingüística clara y decidida pa garantizar la so sobreviviencia. De xuru, porque tampoco hai un proyeutu políticu y cultural n’Asturies. La nuesa llingua ye minoritaria y cuerre un claru riesgu”. Asina, “paezme sinceramente qu’ensin oficialidá l’asturianu nun va poder salvase nes actuales circunstancies”, una oficialidá afayada a “la realidá cultural y social asturiana, y entovía asina, por sí sola, nun va ser abondo. Les llingües fáenles los falantes”.

Pa finar, encamentó a dexar “de llau les duldes” y dicir “sí a les pallabres”, aquelles que “definen el mundu de nuesu”. “Defendamos la nuesa cultura y la nuesa llingua”, reclamó enantes de despidise con un “haxa salú” al estilu del so queríu Pepe El Ferreiro.