La diversidá llingüística ponse en valor nel Día de la Llingua Materna

Esti martes, 21 de febreru, celébrase’l Día Internacional de la Llingua Materna, una xornada que busca poner en valor la diversidá llingüística. Asturies celébralo con delles actividaes empobinaes principalmente a un públicu infantil y nes escueles trabáyase'l material nuevu asoleyáu n’Educastur pa toles etapes educatives n’asturianu y gallego-asturiano.

La Organización de les Naciones Xuníes pa la Educación, la Ciencia y la Cultura (UNESCO, poles sos sigles n’inglés) escoyó’l 21 de febreru como fecha pa celebrar esta xornada en reconocencia a los trés mozos que morrieron en Bangladesh nel 1952 polos disparos del exércitu paquistanín –qu’ocupaba’l país– nuna manifestación en Dhaka pola defensa de la llingua bengalí. El primer Día Internacional de la Llingua Materna foi nel 2000 y, dende entós, tolos años s’aprovecha esta fecha pa recordar la importancia de preservar toles llingües al ser éstes un patrimoniu común de la humanidá.

El tema escoyíu esti añu pa reivindicar na xornada ye ‘Educación Multillingüe (EML), la necesidá pa tresformar la educación’ pa, ente otres coses, “revitalizar les llingües en vía de desapaición o en peligru de desaniciu". N’Asturies el Día Internacional de la Llingua Materna celébrase sobre manera nes escueles, col enfotu de rescamplar la importancia de la conocencia de llingües y concienciar sobre la responsabilidá de caltener la de nueso, l’asturianu o’l gallego-asturiano.

Los centros vienen trabayando estos dies previos colos materiales nuevos con actividaes didáutiques pa toles etapes educatives asoleyaos pola Conseyería d’Educación n’Educastur ‘Recursos pal aula/Recursos pral aula’, accesibles pa tola ciudadanía nesti enllaz, qu’empleguen la ferramienta interautiva Genially. Un mapa de toles llingües europees, una infografía sobre’l Día de la Llingua Materna, frases y espresiones, pallabres o documentales son dalgunos de los preseos que pueden emplegar les maestres y maestros colos sos escolinos.

“El Día Internacional de la Llingua Materna celebra la diversidá llingüística como una pieza que fomenta la tolerancia y el respetu nes sociedaes”, apunten dende Educastur, que rescampla que “la reconocencia y respetu pola diversidá llingüística y cultural estraordinaria d'Asturies contribúi a fortalecer la unidá y la cohesión de la nuestra sociedá”. “El multillingüismu contribúi al desenvolvimientu de sociedaes integradores qu’afalen la coesistencia y l'arriquecimientu mutuu de múltiples cultures, visiones del mundu y sistemes de conocencia”, añaden.

Otros organismos, como la Oficina de Normalización Llingüística de Xixón, aprovechen la xornada pa presentar en redes sociales un dossier con cantares, llibros, programes y eventos en llingua asturiana porque “los primeros años de vida son claves nel deprendimientu d'una llingua, y esto tamién fai que se normalice l'usu del asturianu dende'l nacimientu”.

L’Infiestu, Noreña, Cangas y Grandas de Salime

Política Llingüística tamién quier conmemorar esta fecha tan simbólica, pa lo que programa actividaes d’artes plástiques, teatru y talleres empobinaos al públicu infantil “cola mira de reivindicar la importancia y la riqueza que l’asturianu y l’eonaviegu representen dientro de la cultura asturiana”. La primer va tener llugar esta mesma tarde, Llunes d’Antroxu, en Piloña, na Casa Cultura de L’Infiestu a les 17 hores, y va consistir nun taller sobre les mazcaraes d’iviernu de la mano d’Aladanza Educación y Tradición.

Mañana, Día de la Llingua Materna, va representase en Noreña, a les 18 hores na Casa Cultura, la obra de marionetes ‘Les aventures del cuélebre tragón’, a cargu d’Elisabet Martín Teatro. Tamién va haber teatru’l miércoles, a les 20 hores, nel Teatru Toreno de Cangas del Narcea, col ‘Quixote’ de Carlos Alba.

Pa un públicu adultu ta la opción de visitar la esposición fotográfica ‘Nosoutras somos arte’, de NÍA, proyeutu global p’abordar la desigualdá de xéneru nel Navia-Eo, un “recorrido polos saberes, llabores y conocementos das muyeres del mundo rural al través de testimonios gráficos daos polos sous protagonistas”. Va tar abierta hasta’l 14 d’abril nel Museo Etnográfico de Grandas de Salime ‘Pepe el Ferreiro’, con entrada de 1,5 euros que da accesu a tola instalación, y ente los oxetivos del proyeutu “ta poñer en valor el gallego-asturiano como llingua materna a reivindicar y promocionar xunto ás demáis tradicióis y saberes populares”.