La derecha gana les eleiciones llexislatives anticipaes de Portugal

|

El Partido Social Democrata (PSD) de Pedro Passo Coelho ganó les eleiciones de Portugal que se celebraron esti domingu al algamar el 38,8 por cientu de los votos, insuficientes pa tener la mayoría absoluta. El Partido Socialista (PS) sumó'l 28,1.
 
Estos resultaos dan la victoria a la derecha en Portugal nunes eleciones llexislatives que foron convocaes de forma anticipada pol presidente de la República, Aníbal Cavaco, tres la dimisión del primer ministru, el socialista José Sócrates, el 23 de marzu pola delicada situación del país lusu que-y llevó a solicitar el rescate financieru a los sos socios comunitarios. Al non tener la mayoría absoluta, el PSD va buscar un alcuerdu de gobiernu col tamién conservador Centro Democrático y Social-Partido Popular (CDS-PP), qu’algamó’l 11,7 por cientu de los votos y 24 diputados que van ser claves na formación de gobiernu.
 
Mentes, completen la cámara portuguesa Coligação Democrática Unitária (PCP-PEV), formada por comunistes y verdes, qu’algamó’l 8 por cientu y 16 escaños, y el Bloco de Esquerda, col 5,2 por cientu y 8 diputaos. Mentes, el PSD suma 105 escaños y el PS, 73. Hai que destacar l’astención alta qu’hubo nestes eleiciones, que llegó al 41 por cientu.
 
Coelho, tres conocer los resultaos eleutorales, comprometióse a iniciar “un trabayu incasable” nos cuatro años próximos pa devolver el crecimientu a Portugal y dar cumplimientu al acuerdu de rescate financieru. Pa ello, pidió tamién la collaboración de tolos portugueses y de los partíos políticos con representación nel Parlamentu pa recuperar el “prestixu” y la “credibilidá” del país lusu nel esterior. Afirmó que’l so oxetivu nun ye solo cumplir col programa económicu duru soscritu cola Xunión Europea y el FMI, sinón recuperar “cuanto antes” la confianza de los mercaos nel país”.

Contador Estadistiques