La denuncia de la SGAE amenaza l'Intercélticu d'Avilés

La celebración de dellos conciertos del Festival Intercélticu d'Avilés 2004 va decidise nun xuiciu na viéspora de la inauguración

Esta mesma selmana, los responnsables del Festival Intercélticu d'Avilés recibíen notificación pa presentase nun xuiciu nel que van tener enfrente a la Sociedá Xeneral d'Autores d'España, que-yos reclama los cánones que, en teoría, debe'l festival a la entidá de defensa d'autores dende va ocho años p'acá que se vien faciendo'l festival, arriendes de la suspensión de dellos conciertos enxertos nel programad'esti añu.

Puestos en contactu con Juan Casas, director de l'Asociación Cultural "Esbardu" entidá organizadora del festival, esti esplicó a Asturies.com que la demanda de la SGAE abúlta-yos "absurda" y que la SGAE en cuenta de buscar víes d'enetendimientu "lo que quier ye fastidiar". Casas manifestó que nun ye a entender que la SGAE se mande como si fuere'l ministeriu de facienda cuando ye una entidá privada de xestión y quexóse de que l'ente, que lleva reclamando pagos dende que s'entamó col festival pase agora a la vía xudicial cuando ve que'l festival yá ye daqué d'un volume y importancia que fai d'ello una gran cita musical, ello col agravante de poner el pleitu col festival yá presentáu en público.

En cuantes a la cantidá que-y demanda la SGAE al Intercélticu, Juan Casas nun quixo dicir cifres concretes pero calificó la cifra de "astronómica" y inasumible. D'otra manera, el responsable de la A.C. Esbardu criticó que los conciertos del festival que pretende suspender la SGAE de manera cautelar son los que s'anunciaron na páxina web del certame como adelantos del cartel. Pa Juan Casas esto ye una amuesa de la falta de seriedá d'Autores, y tien pa elli que "si de mano llegamos a anunciar más conciertos, la SGAE pediría tamién que se cancelaren".

Juan sorrayó que na Conceyalía de Cultura d'Avilés mancó muncho l'actitú de la SGAE y declaró que'l conceyu concueya cola postura del festival, que se resume en reclamar la escepción a los cánones de cobru de la SGAE a cuentu de que la música que se toca nel intercélticu ye tradicional y polo tanto ta llibre dafechu del tipu de canon que pretende cobrar la SGAE, que "nin siquiera estrema nes tables de cobru que-y pasó al festival a grupos folk de bandes de gaites".

Pa da-y más dramatismu al casu, la vista del xuiciu nel que va decidise'l destín del intercélticu 2.004 ta puesta pal día 15 de xunu, la viéspora del festival. Hasta esi momentu, Casas dixo que quería más nun facer declaraciones.