La CUOTA manda parar l'autovía en Castropol

La Comisión d'Urbanismu y Organización del Territoriu d'Asturies tuvo ayeri una reunión na que tuvo de da-yos trámite a dellos puntos importantes que veníen enxertos colos planes urbanísticos de Castropol y d'Ayer. En cuantes al conceyu ayerán, que va revisar el Plan Xeneral d'Ordenación Urbana, el noyu del testu a aprebar yera la creación de la Estación d'esquí de "Fuentes d'Inviernu" que la selmana pasada anunció la conseyera que diba ser ún de los proyectos más importantes con cargu a los fondos mineros a desarrollar nel 2004. Pel momentu la CUOTA apautó supeditar la creación del parque a la tramitación previa d'un Estudiu de Impactu Ambiental. L'otru puntu importante taba nel suelu que'l PXOU de Castropol tien d'acutar pal pasu de l'autovía del Cantábricu. La CUOTA decidió plantase nesta estaya, mandando esborriar del PXOU del conceyu tala previsión encontándose pa ello nes competencies esclusives de la Comunidá Autónoma en materia d'ordenación territorial y no que yá espresaren la Xunta Xeneral, el Gobiernu asturianu y la mesma CUOTA. El pasu de l'autovía del cantábricu pela rasa costera occidental, que defende'l Gobiernu central y cuestiona'l Principáu, que ve más afayadizu un trazáu un poco más pal innterior, ye ún de los puntos más importantes na construcción d'infraestructures nel occidente. Nesti sentíu, el Principáu yá presentare en marzu d'esti añu una propuesta pa llevar l'autovía más pa contra l'actual caxa del ferrocarril Ferrol-Xixón

Otramiente, la CUOTA dio de pasu dos proyectos de volume importante n'Avilés y Uviéu. El primeru cuenta con urbanizar 15 Ha en Valgranda pa la promoción de 500 viviendes, de les que 277 d'ellas van ser de protección público. N'Uviéu, la CUOTA alcordó echar a andar el proyectu del Prau la Vega pa poner en mercáu 60Ha empobinaes a la construcción de 3.566 viviendes, de les que'l 58% van tener que ser de protección público.