La cultura sidrera y la llegada de la velocidá alta centren la temática del pabellón del Gobiernu na FIDMA

|
 ‘La cultura sidrera, esencia d’Asturies. Conexión natural’

Col títulu billingüe ‘La cultura sidrera, esencia d’Asturies. Conexión natural’ preséntase la esposición d’esti añu del pabellón del Gobiernu na LXV Feria Internacional de Muestres d’Asturies (FIDMA). Pretende reflexar la tresformación del país “al traviés de dos elementos vertebradores del territoriu: la sidra y el ferrocarril”.

L’amuesa “repasa cómo la cultura sidrera supo adaptase col pasu del tiempu per aciu de la modernización de procesos, la innovación y la busca de la escelencia del productu, tou ello ensin perder nenguna de les sos señes d’identidá esenciales, que convirtieron esa cultura milenaria nún de los principales emblemes d’Asturies”. Asina, al traviés de paneles y audiovisuales, los visitantes del espaciu van poder conocer los diferentes tipos de manzana utilizaos pa facer la bébora, los llagares tradicionales y modernos y toles empresas auxiliares que participen nel ciclu d’elaboración del productu, amás de descubrir les carauterístiques de la sidra eslpumosa y de la natural con Denominación d’Orixe Protexida (DOP), probar l’habilidá nun túnel d’escanciáu y sacar semeyes nun chigre tradicional.

Na parte baxa de la instalación va asitiase la parte dedicada a la conexón ferroviaria cola meseta. L’Alministrador d’Infraestructures Ferroviaries (Adif) presenta, con infografíes y imáxenes, los grandes fitos n’inxeniería, sostenibilidá y conexón fechos na llinia que va coneutar en mayu La Pola Ḷḷena con Madrid.

Les persones que s’averen al llugar descubrirán los beneficios de la llinia de velocidá alta, utilizarán un espeyu interautivu y disfrutarán d’un audiovisual inmersivu, nel que’l paisaxe asturianu gana especial protagonismu, qu’amuesa’l retu que supunxo pa la inxeniería salvar la muria natural que ye’l cordal.

Actividaes complementaries

Dende’l sábadu, xornada na que la FIDMA va abrir les sos puertes al públicu, el Gobiernu va entamar delles actividaes complementaries a ‘La cultura sidrera, esencia d’Asturies. Conexión natural’. La primera va ser un taller familiar de nome ‘El origen de la sidra…, las manzanas” que va tener llugar a les 12.30 y a les 18.30, con una hora de llargor.

Anabel Santiago va actuar el domingu a les 19 hores con un repertoriu de cantares tradicionales y populares sobre la sidra y la mazana. Mentes, ‘InmerSidra: pon a prueba en un entorno de realidad virtual tu destreza escanciando sidra de Asturias’ va desendolcase’l xueves de 11.30 a 14.30 y de 18.30 a 20.30 hores, y el sábadu 13, domingu 14 y llunes 15 va haber actividaes d’animación de 12 1a 14 y de 18 a 20 hores baxo’l nome de ‘Juega a lo grande y pon a prueba tu puntería y precisión con el juego de la rana gigante’.

Completen la programación del pabellón una clase maestra d’echar sidra, de nome ‘Ven a echar un culete’ a cargu de Loreto García, el xueves 18 a les 18.30 hores, y David Acera cola narración oral ‘Cuentos, pomaradas y llagares’ el sábadu 20 a les 12.30 y a les 18.30 hores.

Contador Estadistiques