La Cruz Roxa d’Asturies celebra los sos 130 años con un programa sobre derechu humanitariu

La organización internacional Cruz Roxa celebra anguaño los sos 130 años n'Asturies. El Presidente de Cruz Roxa d'Asturies y los presidentes de les asamblees locales de Xixón, Uviéu y Avilés presentaron esta mañana los actos del programa especial d'actos, que, baxo'l títulu "La protección de les víctimes nos conflictos armaos" va incluyir proyecciones de cine, esposiciones, meses redondes y conferencies. Los actos entamen el 27 d'ochobre y van durar hasta'l 12 d'avientu.

Francisco Fernández Corte, presidente autonómicu de Cruz roxa n'Asturies, presentó esta mañana n'Uviéu los actos de conmemoración de los 130 años de la presencia de Cruz Roxa n'Asturies faciendo un resume de los cambeos esperimentaos por esta organización, de la que dixo que pasó de ser "organizativamente militarizada" a ser una entidá democrática na que la voluntá de los sos 9.000 socios ye determinante. Corte recordó que Cruz Roxa lleva un tiempu tamién cambiando l'enfoque del trabayu que fai hacia una estaya más asistencial, y alvirtió que "anque la xente yá nun vea tanto les nuestres ambulancies y nun tengamos un llabor centráu n'atención hospitalaria, Cruz Roxa d'Asturies tien nesti momentu un papel asistencial de muncha importancia pa la sociedá asturiana, sobremanera pa la xente mayor".

Fernández Corte y el responsable de les xornaes, Javier Fernández, xustificaron la oportunidá del eventu porque los conflictos armaos internacionales son ún de los temes de mayor actualidá y porque amás esisten situaciones de vaciu llegal onde s'atenta contra los derechos humanos, casu del campu de prisioneros de Guantánamo (Cuba) que llamen a organizaciones como Cruz Roxa a facer un esfuerzu de conciencaión social sobre estos asuntos, un propósitu pal que l'aniversariu paecía puestu a costafecha.

El programa d'actos tien como acontecimientu central una conferencia sobre Derechu Internacional Humanitariu que va celebrase n'Auditoriu "Príncipe Felipe" d'Uviéu a lo llargo de los díes 2, 3 y 4 d'avientu y na que la entidá cuenta con aconceyara más de 175 profesionales del derechu, pero'l programa incluye otros actos complementarios a celebrar ente Uviéu y Xixón y ente los que llama l'atención el ciclu de cine sobre Derechu Humanitariu, en collaboración cola Filmoteca d'Asturies. Esti ciclu va proyectar seyes películes, presentaes cauna por un espertu na materia que va ilustrar al públicu sobre les cuestiones tocantes a derechu humanitariu que salgan nel filme. El ciclu incluye títulos como "Axenda oculta" de Ken Loach, que va valir pa falar sobre Derechos Humanos y Estáu, o "Blade Runner" historia futurista que'l caderalgu de Filosofía del Derechu Javier Martín va emplegar pa traer el debate hacia cuestiones d'inmigración y Derechos Humanos.

D'otra manera, el programa incluye tamién delles conferencies sobre cuestiones como'l mercáu d'armes, la protección de víctimes en guerra, l'accesu a los medicamentos y una esposición cedida por Cruz roxa Internacional entitulada "Mujer y Guerra" que va poder vese na Plaza Trescorrales d'Uviéu. Con motivu d'estes xornaes, Cruz Roxa va presentar tamién, en collaboración cola Conseyería de Xusticia y la Universidá d'Uviéu una Unidá de Derechu Internacional, que va funcionar como un órganu más de la entidá humanitaria.