La creación de la Mesa del Deporte Practicáu por Muyeres busca fomentar la igualdá en toles disciplines

La Conseyería de Cultura, Política Llingüística y Deporte va constituyir el 19 de marzu la Mesa del Deporte Practicáu por Muyeres pa fomentar la igualdá real ente homes y muyeres. Ésta va tener nome n’asturianu.

La conseyera Ana Vanessa Gutiérrez anunció ayeri nes xornaes ‘Mujer y Deporte’ celebraes nel recintu deportivu d’El Campo’l Morgal, destinaes a muyeres mayores de 35 años, esti grupu de trabayu nuevu que va axuntar a los clubes representativos del deporte femenín asturianu –tanto d’equipu como de deporte individual–, deportistes, entrenadores, xueces y árbitres. La Mesa del Deporte Practicáu por Muyeres “aspira a ser una ferramienta efeutiva pa ellaborar un plan d’aición con midíes que sofiten y fomenten el deporte femenín. Va analizar, dende les árees onde podemos ameyorar, les necesidaes que tengan los clubes y les muyeres deportistes, y les actuaciones que podemos implementar dende esti equipu de trabayu”, esplicó.

“El llabor conxuntu colos clubes y les propies deportistes ye fundamental p’avanzar n’igualdá”, rescampló Gutiérrez, qu’asitió esti oxetivu como una política tresversal de la so conseyería y del Gobiernu. La creación d’esta mesa ye una midida que s’incorpora al paquete impulsáu pol Executivu pa consiguir una igualdá real y efeutiva ente hombres y muyeres, especialmente nel deporte, un ámbitu nel que “necesitamos siguir desendolcando polítiques feministes que frenen les desigualdaes que, por desgracia, vemos que se siguen dando nel mundu deportivu”.

‘Mujer y Deporte’

L’actividá ‘Mujer y Deporte’ tien como oxetivu “fomentar un estilu de vida saludable y contribuyir a eliminar les barreres adicionales a les que s’enfrenten munches muyeres cola edá”, apunten dende la conseyería. La cita axuntó a participantes de deportes como’l rugbi, pádel, tiru con arcu o bolos, y contó con clases d’exerciciu físicu impartíes pola ex piragüista olímpica Luisa Álvarez.

Na semeya, Gutiérrez, a la izquierda, y Manuela Fernández Ena, direutora xeneral d'Actividá Física y Deporte, a la derecha, xunto a participantes na xornada 'Mujer y Deporte'.