La Coordinadora torna a comprobar afeiciones medioambientales nes obres del enllaz de Lieres

L’enllaz que se constrúi en Lieres pa xunir el corredor del Nalón cola autovía Uviéu-Villaviciosa al traviés de la ‘Y’ de Bimenes ta provocando delles afeiciones medioambientales. La Coordinadora Ecoloxista denuncia esta situación otra vuelta.
 
Asina, treslladó-y la so protesta a la viceconseyería de Mediu Ambiente y a la Confederación Hidrográfica del Cantábricu. Según espliquen los ecoloxistes nun comunicáu, “na zona, nel calce del ríu Nora, tán faciendoses trabayos d’esbroce qu’afeuten non solo a la ribera sinón tamién al propio cauce del río. Entiéndese l’esbroce nesti puntu, yá que la construcción de ciertos viales atraviesa’l ríu nesi tramu, pero nun se comprende la forma na que se fixo, al nun tener consideración nenguna pol ríu nin el mediu ambiente en xeneral”.
 
Ente les afeiciones ambientales que pudo comprobar la Coordinadora Ecoloxista d’Asturies ta l’esbroce de zones nes que nun yera necesario valtar, lo que provoca nel Nora “l’alteración de tolos procesos físico-químicos y biolóxicos que se producen nel propiu ríu, yá que da lugar a un aumentu de la temperatura de les agües al nun esistir solombra sobre’l calce”. Ello lleva como consecuencia “cambios na composición florística y faunística del ríu, con perdes de les especies más delicaes”, amás de la destrucción de los hábitats necesarios pal resguardu y la sobrevivencia de los pexes y otros muchos animales y plantes. Otres irregularidaes qu’apunten los ecoloxistes ye la turbieza del agua tres un argayu de parte la escollera sobre’l Nora, lo que nun dexa pasar la lluz imprescindible pal desarrollu de les plantas y animales que viven nel ríu; y l’estrozu de viesques de ribera, protexíos como ‘Habitat d’interés comunitariu prioritariu’, dientro de la temporada de cría d’aves.
 
Dende’l coleutivu ecoloxista soliciten al Gobiernu qu’abra un espediente sancionador a al UTE Lieres y se paralice l’actividá d’esta xunión temporal d’empreses hasta que nun se pongan en marcha les midíes necesaries pa iguar los daños fechos.