La Coordinadora pide que nun s’autoricen delles modificaciones sobre la regasificadora

Enagás, empresa que ta construyendo la regasificadora d’El Musel, solicitó a Mediu Ambiente la modificación de les condiciones medioambientales de la planta. La Coordinadora Ecoloxista reclama que nun s’autoricen estos cambios.
 
En concreto, Enagás quier aumentar l’altura de l’antorcha y non depurar les agües pluviales, “lo que nos demuestra’l nivel de chapuza de la tramitación ambiental al querer modificar en plenu procesu de construcción delles de les condiciones”, señalen dende la Coordinadora Ecoloxista d’Asturies. El coleutivu apunta que l’aumentu d’altura solicitáu pola empresa, hasta llegar a los 74 metros, “xenera un incrementu de la cuenca visual de la regasificadora, lo que non podemos menospreciar ante l’impactu que pueda suponer d’incrementu de contaminación paisaxística”.
 
No que respeuta al tema les agües pluviales, los ecoloxistes consideren “disparatada” la propuesta d’Enagás. Ésta consiste en solicitar verter estes agües en 13 zanxes drenantes na mesma parcela, “colos impactos que suponen de contaminar el subsuleu de la zona y les filtraciones al mar de los contaminantes que lleven estes agües pluviales”, en cuenta de treslladales a la depuradora. “Nos sorprende que se diga que llevar esti agua a la depuradora suponga un gran impactu ambiental –como si l’impactu de la regasificadora pegada a los vecinos d’El Muselin fora una anécdota– cuando a menos de 2 quilómetros ta la depuradora d’Aboño”, y podría treslladarse “mediante bombéu pal so tratamientu afayadizu”, argumenten dende la Coordinadora.
 
El coleutivu ecoloxista aprovecha tamién pa recordar que la planta regasificadora que tán construyendo n’El Musel ye “innecesaria al non esistir demanda de gas natural que la xustifique”, amás de suponer un peligru pa les 70.000 persones que viven nun radiu de 2.000 metros de la instalación. Ello, ensin escaecer el “impactu paisaxísticu fuerte pol tamañu importante de los depósitos, que tendrán una altura de 50 metros, y les instalaciones complementaries que se van divisase dende Gozón, Carreño y Xixón”.