La Coordinadora llamenta que nun se tuvieren en cuenta les alegaciones a un tramu d’alta tensión en Serín

La Conseyería d’Economía y Emplegu aprobó un tramu d’alta tensión en Serín que ta destináu a alimentar la futura subestación proyeutada pa la incineradora. La Coordinadora llamenta que nun se tuvieren en cuenta les alegaciones.
 
Nuna nota unviada güei pola Coordinadora Ecoloxista d’Asturies, el coleutivu amuesa’l so esmolecimientu pola decisión espublizada nel BOPA del 6 de febreru d’aprobar y declarar d’utilidá pública un tramu d’una llinia d’alta tensión de 132 kV –proyeutáu por Hidrocantábrico Distribución Eléctrica– ensin atender les alegaciones de vecinos, Unidá Nacionalista Asturiana, l’Asociación Asturiana de Amigos de la Naturaleza (ANA), l’Asociación de Vecinos y Amigos San Miguel de Serín y la propia Coordinadora. Según espliquen los ecoloxistes, esta llinia, que tien como fin tresportar lletricidá a la subestación futura del Centru de Tratamientos de Residuos de Coxersa pa facer funcionar la incineradora, agora parada pola xusticia, “nun tien xustificación dalguna”.
 
Ente les crítiques de la Coordinadora al proyeutu ta que “nun se valora l’impautu na salú de los vecinos”, “nun se fixo un estudiu seriu d’alternatives al trazáu d’esta llinia”; nun se valora “l’impautu de los pasillos d’alta tensión”, “nel paisaxe” y na “flora y fauna”; “nun se tien en cuenta l’impautu de l’acumulación de riesgos” y “nun s’atiende la necesaria aceptación social del proyeutu”. D’igual forma, denuncia la complicidá del Conceyu de Xixón al nun comunicar a los afectaos “en nengún momentu” d’esti trámite, nel que ye obligatorio informar a los vecinos, que van ver perxudicao “el so patrimoniu, la so salú y el so entornu. Sicasi, sí informó de manera favoratible al Principáu pa la construcción de la llinia”.
 
 
Na semeya, una imaxe d'una zona de la parroquia de Serín per onde va pasar la llinia d’alta tensión.