La Coordinadora Ecoloxista torna a solicitar a Mines la paralización de la cantera de Castañera

Les irregularidaes ambientales que tán produciéndose na cantera de Castañera llevó a la Coordinadora Ecoloxista a solicitar a Mines la so paralización. Hai dos años, los ecoloxistes yá denunciaron la so situación precaria.
 
La cantera, asitiada nel conceyu de Sariegu, incumple, n’opinión de la Coordinadora Ecoloxista d’Asturies, delles irregularidaes ambientales dende la so ampliación última, amás de contar con “instalaciones precaries”. Pese a ello, el Gobiernu ta permitiendo l’actividá d’esta cantera del macizu de Peña Careses, na llenda col conceyu Siero.
 
Les condiciones que nun se cumplen nesta cantera son la proyeición de partícules por voladures fuera del perímetru de la esplotación; la falta d’un tratamientu d’agües; el non asfaltáu de les zones de pasu de vehículos, polo que se llevanta polvu de forma continua; l’escesu de ruíu; la presencia de llodos na carretera d’accesu a la esplotación, lo que fai evidente “que la piscina precaria pa llimpieza de les ruedes de los camiones nun cumple cola so función”; l’ausencia d’una rede cinexética qu’impida’l pasu d’animales; l’almacenamientu de la piedra nuna parcela axacente, ocupando parte del marxe de la carretera, col riesgu qu’ello supón pa la circulación; y la falta d’una pantalla vexetal que reduza’l ruíu y el polvu. “Por too ello, solicitamos que se proceda ensin perda de tiempu a la paralización de la industria estractiva hasta que nun cumplen les condiciones que se precisen”, reclamen los ecoloxistes a la Direición de Mines de la Conseyeria d’Industria y Emplegu.