La Coordinadora Ecoloxista pide la paralización del parque eólicu de Sierra de Porta

La Coordinadora Ecoloxista d’Asturies solicitó al Gobiernu la paralización del parque eólicu de Sierra de Porta, nel conceyu de Castropol. Los ecoloxistes aseguren qu’esti proyeutu tien delles iregularidaes alministratives.
 
“Pretenden un parque eólicu con 25 molinos de 2 megavatios –una potencia total 50 megavatios– con una altura total de 170 metros, 40 metros más que l’edificiu mas altu d’Asturies, la torre la Llaboral de Xixón”, apunten dende la Coordinadora, qu’añade que “estos aeroxeneradores nun son los que la empresa solicitó na fase de competencia. D’aquella, los molinos teníen 60 metros menos d’altor que los qu’agora pretenden”. Amás, la memoria del parque eólicu de Sierra de Porta nun presenta alternatives diferenciaes d’emplazamientu, como marca la llei, nin tampoco señala la distancia que van tener los molinos de viviendes, namái de los núcleos poblacionales cercanos. Tamién presenta carencies na midida de propuestes pa reducir l’impactu ambiental del parque, ente otres munches más irregularidaes qu’atopen los ecoloxistes.
 
Dende la Coordinadora recuerden qu’esti parque eólicu de Castropol ye ún de los 90 que tán previstos nel occidente asturianu, polo que, amás del impactu qu’estos suponen, hai qu’añadir el que provoquen les llinies d’evacuación y les subestaciones llétriques. Por ello, consideren necesario la execución d’una Evaluación d’Impautu Estructural y una Evaluación Ambiental Estratéxica –según marquen les llexislaciones nacional y europea–, pal conxuntu d’instalaciones previstes nesta fastera del país.