La Coordinadora Ecoloxista entruga qué va facer Xixón pa menguar la contaminación

La Coordinadora Ecoloxista d'Asturies presentó un escritu pidiéndo-y información al Conceyu de Xixón interesándose poles midíes qu'adoptare'l conceyu pa menguar los índices de contaminación del conceyu, que diz que son mui altos acordies coles mediciones oficiales.

Según la Coordinadora, los índices de Partícules en Suspensión (PM10) venceyaes a molesties respiratories, perpasaron nel 2005 los niveles de protección a la salú 149 díes del añu, ello cuando la llei apauta un tope d'emisiones de 50 ug/m3 que nun podría perpasase más de 35 veces al añu, conseñándose amás un valor mediu añal d'esti axente contaminante de 52 ug/m3 mui penriba de los 40ug/m3 permitíos por llei y llegando a rexistráse una medición puntual de 832 ug/m3, un valor 20 veces sobre'l tope.

Otru de los contaminantes que se midieron foron los Óxidos de Nitróxenu (N02), axentes qu'enriten les membranes respiratories y nos que se pasó la raya llegal de 200 ug/m3 trés vegaes nel añu. Anque la presencia media añal d'esti contaminante n'atmósfera de Xixón nun pasó'l tope llegal, el valor midíu de 38 ug/m3 allégase peligrosamente al tope de 40 ug/m3 consentíos. Los datos oficiales amuesen que si se perpasaron delles vegaes nel añu los topes nel nivel d'otru axente qu'ataca los texíos respiratorios como ye l'ozonu (AOT) mientres que los niveles d'otros axentes contaminantes como'l Dióxidu d'Azufre (SO2) nun valtaron los topes llegales anque s'allegaron peligrosamente a ellos.

La Coordinadora diz que ye "evidente" que'l Conceyu de Xixón ha asumir les sos responsabilidaes y trabayar pa que se reduzan los niveles de contaminantes de los que responsabiliza "a una industria a la que se-y consiente que funcione en precario y a un tráficu rodáu escesivu", apuntando a la necesidá de menguar les emisiones nuna ciudá onde hai una de les tases d'enfermos respiratorios, cardiovasculares y tumorales, males toos ellos agravaos pola contaminación ambiental, más altes d'Asturies.