La Coordinadora Ecoloxista denuncia la presión inmobiliaria sobre la costa asturiana

Les declaraciones que nos últimos díes fixeron instituciones como'l Colexu d'Arquitectos o la Federación Asturiana de Conceyos nes que defenden que nun hai mayor riesgu d'urbanización de la costa asturiana merecieron el retruque de la Coordinadora Ecoloxista d'Asturies, que diz que nun tien xacíu que conceyos que pierden tolos años se planteguen doblar el númberu de residencies.

El Colexu d'Arquitectos d'Asturies falaba esta selmana de que la costa asturiana tien una situación "de privilexu" respective a otres comunidaes autónomes no tocante a conservación de la costa, mientres que la Federación Asturiana de Conceyos peritaba que namás diben construyise na costa asturiana sobre 30.000 viviendes, y non les 60.000 de les que falen colectivos ecoloxistes y partíos políticos d'izquierda y nacionalistes.

Contra estes afirmaciones, la Coordinadora Ecoloxista d'Asturies recalca nos sos datos y diz que son cerca de 80.000 les viviendes que tan proyectaes na costa asturiana a mediu plazu, de les qu'amás cerca de 65.000 van funcionar como segundes residencies, una circunstancia que va facer qu'a conceyos como Llanes, Ribeseya o Colunga que yá tienen una media del 60% de les sos viviendes vacies fuera de los meses de branu, se-yos agrave esti problema, en cuantes que les segundes residencies xeneren gastu pa l'alministración local pero aporten pocos ingresos, neto que l'ausencia de los sos habitantes va suponer que l'actividá económica del conceyu mengüe.

La Coordinadora afirma que conceyos como LLanes, Ribeseya, Gozón, Cuideiru, El Franco o Castropol, tienen yá enriba la mesa proyectos pa doblar el númberu de viviendes edificaes, dalgo que los ecoloxistes ven una llocura nuna comunidá autónoma que tien "un crecimientu vexetativu ridículu" acusando de querer "edificar y hormigonar ún de los valores más importantes d'Asturies como ye la so costa". Ente los datos qu'aporten pa probar lo que diz, la Coordinadora asegura que Caravia, con 400 viviendes pretende construyir 2.000, mientres que Colunga, con 4.000, quier que se llevanten 7.000. En proporciones asemeyaes taría Muros del Nalón, que va va amestar 2.300 viviendes a les 1.400 de que dispón o Ribedeva, que con 1.300 ta preparándose p'acoyer 2.400.

L'alministración local carga coles más de les culpes de la Coordinadora, qu'acusa a los conceyos d'actuar "llamaos pol dineru fácil de les tases y llicencies de construcción" al empar qu'afirma que "Con declaraciones como les del Colexu d'Arquitectos y la Federación Asturiana de Conceyos, namás que se contribuye al aprobecimientu en tolos sentíos del Paraísu Natural asturianu, que tán desaniciando a preciu de saldu".


Amás de condenar la sobrecarga que van facer estes viviendes, qu'amás aseguren que namás van ocupase estacionalmente, sobre los sistemes d'agua y alcantariellao o recoyida de basura, la Coordinadora denuncia que se trata de viviendes bien distintes a les tipoloxíes tradicionales, que van sustituyise por otres más afechisques pal interés de los constructores, anunciando un futuru en que vamos venos "arrodiaos d'apartamentos clónicos y truébanos de xalés adosaos acompañaos bien de vegaes de campos de golf que van consumir millones de metros cúbicos d'agua".