La Coordinadora Ecoloxista denuncia la parte de responsabilidá asturiana nel cambéu climáticu

Dempués de presentase esti vienres en París l'estudiu encargáu pola ONU al grupu de científicos espertos nel clima del IPCC que conseña'l recalentamientu global del planeta y la influyencia nesti procesu del ser humanu, la Coordinadora Ecoloxista d'Asturies emitió un comunicáu en que rescampla la parte de responsabilidá asturiana nel cambéu climáticu.



La Coordinadora Ecoloxista afirma que n'Asturies "el gobiernu mira pa otru llau" y "quier condenanos a tener los mayores niveles de contaminación d'aire d'España y les mayores tases d'emisiones de CO2 a l'atmósfera por habitante d'Europa". Más allá de la incidencia d'estes emisiones sobre'l clima del planeta, la Coordinadora llama l'atención sobre'l dañu inmediatu a la salú de los asturianos d'estes emisiones en forma de males respiratorios, cardiovasculares y tumorales, que faen qu'Asturies presente "la mayor tasa de morbilidad ambiental d'España".



Contral discursu "de desarrollu sostenible" que s'afirma que fai el Gobiernu asturianu, la Coordinadora denuncia que lo que se fai ye "solicitar mas derechos d'emisión pa les empreses contaminantes que tenemos y facilitar la instalación de procesos y empreses qu'aumenten les emisiones de gases d'efectu invernaderu". Ente los proyectos más dañibles pal mediu ambiente a llevar alantre n'Asturies, la Coordinadora llama l'atención sobre la incineradora de COGERSA, pa la que perita unes emisiones de 600.000 tonelaes de CO2 al añu o la térmica de carbón nueva d'Aboño, que vertería a l'atmósfera 4.300.000 tonelaes d'esti gas, una cantidá que fai pequeña'l conxuntu de 8 térmiques de gas previstes per tola xeografía asturiana, que supondríen un total de 11.650.000 tonelaes de CO2 al añu.

Opina sobre esti tema en Conceyu Abiertu