La Coordinadora Ecoloxista d'Asturies recuerda la peligrosidá de la planta de residuos d’El Musel

La Coordinadora Ecoloxista d’Asturies ta acabante de presentar suxerencies al Gobiernu nel trámite ambiental del proyeutu de la planta de residuos d’El Musel. Los ecoloxistes recuerden la peligrosidá de la instalación pa los vecinos.
 
El Centru de Tresferencia de Residuos, Almacenamientu de Productos Químicos y Terminal de Ferrocarril de Mercancíes Peligroses, que va situase nel muelle de la Osa de puertu xixonés nuna parcela de 11.246,90 metros cuadraos ganada al mar mediante rellenos de dellos materiales non coincidentes colos del proyetu –según los ecoloxites nun hai garantía d’estabilidá de los depósitos en carga–, “pretende utilizar Xixón como destín de residuos d’otros llugares, para valorizar unos n’Asturies y otros esportarlos”, apunten dende la Coordinadora. El coleutivu entiende qu’ésta ye “una actividá peligrosa”, lo que pue dar una idea de los proyeutos que tán estudiándose “pa convertir la superincineradora de Coxersa nun centru de residuos industriales de toda España”.
 
Dende l’asociación ecoloxista recuerden la esistencia de munchos almacenamientos de sustancies inflamables y peligroses nes instalaciones portuaries, lo que supón una amenaza pa les 75.000 persones que viven a menos d’un quilómetru d’El Musel. A ello hai que sumar la contaminación atmosférica que va provocar esta planta, l’aumentu del ruiu y de vibraciones pola actividá o la posibilidá de contaminación de les agües del Cantábricu, ente otros aspectos negativos. La Coordinadora critica tamién que les autoridaes nun informaren tovía a vecinos de la zona de los impautos asociaos de la planta de residuos, que va tar a menos de mil metros de viviendes.