La Coordinadora Ecoloxista d'Asturies presenta alegaciones a la subestación de Serín

|

Representantes de la Coordinadora Ecoloxista d'Asturies presentaron alegaciones ante’l Ministeriu d’Industria nel trámite d’estudiu ambiental pa la subestación de Serín nueva. Ésta tien delles llinees d’alta tensión asociaes de 400 quilovatios.
 
Dende’l coleutivu ecoloxista consideren que “l’estudiu presentáu ye nulu de plenu derechu al resultar imprescindible que se tenga en cuenta non solo les afeiciones series que xenera al entornu inmediatu onde s’instala la subestación, sinón los efeutos enllazaos que conlleven estas instalaciones”. La subestación de Serín, que lleva’l nome de Costa Verde, forma parte de un proyeuto o plan más ampliu que conecta con Soto-Penagos y que supón llenar tola zona central d’Asturies con llinees d’alta tensión y delles subestaciones (Gozón, Reboria o Llangréu, ente otres), lo que lleva a los ecoloxistes a non entender “por qué se presenta nesti trámite esti tramu”. “Si el conxuntu se considerase un plan debería someterse a la evaluación prevista na Llei 9/2006 d’evaluación de planes y programas”, recuerden.
 
Les alegaciones que la Coordinadora tresmite al ministeriu apunten que la subestación de Serín nun tien xustificación dalguna y que nun se cuenta col impautu na salú de la xente que vive cerca de subestaciones o de pasillos d’alta tensión, asina como nel paisaxe. D’igual forma, los ecoloxistes tamién señalen l’impautu altu que va tener na fauna y na flora del llugar y destaquen l’acumulaciones de subestaciones na zona, col riesgu qu’ello conlleva. Por último, critiquen les perdes que xenera producir enerxía n’Asturies “pa llevala a Madrid” y la falta d’información que tienen los vecinos de la parroquia xixonesa de Serín, que nun contaben con esta instalación que, de primeres, se pretendía instalar en Tremañes.

Contador Estadistiques