La Coordinadora Ecoloxista d'Asturies, contraria a la quema de residuos en Ciañu

La modificación de Mediu Ambiente de l’Autorización Ambiental Integrada a la empresa Química del Nalón llevó a la Coordinadora Ecoloxista a presentar un recurso de reposición. Los ecoloxisten tán a la escontra de la quema de residuos.
 
El cambiu concedíu a la empresa llangreana permite la quema de residuos non peligrosos y l’aumentu de los niveles de sulfatos nos vertíos d’agua, dos actividaes que los ecoloxistes refuguen por ser contaminantes. “Sorprende que s’autorice a una actividá yá de por sí mui contaminante como la quema de residuos non peligrosos nel procesu ensin l’estudiu correspondiente d’impautu ambiental”, manifiesten nun comunicáu dende la Coordinadora Ecoloxista d’Asturies.
 
Los ecoloxistes ven tamién “estraño” que se permita a la empresa l’aumentu de la cantidá de sulfatos vertíos al dominiu públicu cuando un nivel eleváu d’estos da un sabor amargu y desagradable al agua, y xenera un fuerte golor. D’igual forma, el coleutivu asegura ablucar porque’l Gobiernu del país nun procediera a dar trámite d’Audiencia a la Coordinadora Ecoloxista a pesar de que fueron “los únicos” que presentaron alegaciones al trámite de l’autorización ambiental nel añu 2008. “A diferencia de lo qu’asocede n’otres comunidaees, equí autorizase mas contaminación, lo que supón un empeoramientu d’un procesu contaminante a espaldes de la ciudadanía, ensin los trámites perceutivos d’información publica”, afirmen.