La Coordinadora Ecoloxista critica que’l Gobiernu permita irregularidaes na cantera de Peḷḷuno

|

La Coordinadora Ecoloxista d’Asturies criticó esti llunes la resolución del Gobiernu de formular la declaración d’impactu ambiental a la cantera de Peḷḷuno. Los vecinos y grupos ecoloxistes veníen denunciando munches irregularidaes nella.
 
Esta decisión de la Conseyería de Fomentu, Ordenación del Territoriu y Mediu Ambiente del 27 de setiembre, espublizada güei nel BOPA, sorprendió a la Coordinadora al presentar la cantera, perteneciente a Cantera El Reguerón S.L., “una precariedá importante” y provocar “problemes pa los vecinos de Ḷḷevinco y Peḷḷuno”, nel conceyu d’Ayer. Tanto los vecinos, como grupos ecoloxistes y formaciones polítiques como UNA o IX-LV, presentaron numberoses alegaciones contra’l proyeutu de la empresa por razones medioambientales y de seguridá.
                                          
“Nun dexa de ser ridícula l’actitú del Principáu que, sabiendo los incumplimientos continuos de la esplotación actual, que ponen en riesgu la vida de los vecinos, torna a imponer a la empresa unes condiciones ambientales nesta ampliación nueva cuando nun les cumple yá na anterior, autorizada nel añu 2003”, señalen dende la Coordinadora, que ve nesta decisión “una muestra del coladeru que supón el Principáu pa estes actividaes mineres que faen lo que-yos da la gana per toda Asturies cola complicidá de quien les tien que vixilar”. Pa finalizar, los ecoloxistes señalen que van siguir trabayando pa paralizar esta esplotación “porque la llei nun pue ser pa toos menos pa les canteres”.

AdxuntuTamañu
PDF icon Resolución cantera de Pel.luno_.pdf353.37 KB
Contador Estadistiques