La Coordinadora Ecoloxista condena la “falta d’interés mediuambiental” del executivu asturianu.

La Coordinadora Ecoloxista d'Asturies solicitó-y a la Conseyería de Mediu Ambiente, Ordenación del Territoriu y Infraestructures que se llame yá a a conceyu al Conseyu de Mediu Ambiente d'Asturies, órganu que namás aconceyó una sola vez na presente llexislatura cuando polos sos estatutos tendría de facelo cada 6 meses.


La Coordinadora, como una de les organizaciones con representación nesti organismu asesor de la Conseyería, camienta que con ser graves enforma bien de los temes rellacionaos col mediu ambiente que pasaron pela conseyería nel añu últimu, nun se fizo dende'l gobiernu asturianu consulta nenguna, lo que demostraría la "falta d'interés mediuambiental" del executivu asturianu.


La Coordinadora argumenta que'l Gobiernu Asturianu ye, con diferiencia, el mayor agresor al mediu ambiente con actuaciones polémiques enforma, yá seya como promotor o como executor directamente d'obres de gran impactu nuna llista llarguísima na que los ecoloxistes incluyen la estación d'esquí de Puirtu Braña, la obra de El Musel, la regasificadora, les llinies d'alta tensión, les plantes de ciclu combináu, el refuxu del Meicin o les campañes sobre'l llobu.

Pal grupu conservacionista "resulta sorprendente que'l PSOE y IX falen de la defensa de la participación ciudadana nos foros esistentes cuando n'Asturies ello nun se lleva a términu, demostrando que "una cosa ye ufiertar y otra gobernar" lo que-yos lleva a la conclusión de que "l'accesu a la información ambiental más que cuestión de voluntá ye una obligación que nesti casu l'alministración decidió saltase".

Énte esta situación, la Coordinadora valora la xestión ambiental del actual gobiernu como "nefasta" acusando al executivu IX-PSE de "practica constante de la sistemática falta de tresparencia de la información ambiental" polo que reclamen que se llame a conceyu a esti órganu asesor y que tamién se-y dean más competencies.

El Conseyu de Mediu Ambiente ye un organismu de calter asesor en temes ambientales ensin poder decisoriu creáu por iniciativa d'anteriores gobiernos autonómicos imitando modelos de participación asemeyaos que yá esistíen n'otros países y nelli tan presentes representantes d'organismos distintos, ente ellos delles conseyeríes, Conceyos, el sector empresarial, los sindicatos mayoritarios, grupos ecoloxistes, la Federación de Montaña o la Universidá