La Coordinadora ecoloxista alega contra’l proyectu d’una fábrica de biocombustibles n’El Musel

La Coordinadora Ecoloxista d'Asturies presentó escritu d'alegaciones al proyectu d'instalación d'una nueva planta de biodiesel pal puertu d'El Musel en Xixón. La fábrica que proyecta'l grupu Duro Felguera tendría una capacidá de producción de 120.000 Tonelaes al añu y una capacidá d'almacenamientu de cerca de 100.000 m3 de biocombustibles según esplicó la coordinadora, que denuncia los posibles vertíos y peligros de la instalación y que llama l'atención sobre la escesiva concentración de fábriques d'esti tipu nos cais del puertu xixonés, en cuantes que ta prevista una fábrica con cuatro vegaes más capacidá que la del grupu asturianu.

La Coordinadora denuncia problemes na falta d'especificación del procesu que va siguise pa la producción del combustible y alvierte de posibles vertíos al sistema d'agües que faen precisa una depuradora específica pa esta planta al incluyir los vertíos bien de productos químicos que podríen estropiar el sistema de depuración normal. L'usu nel procesu de glicerina y los problemes derivaos de la lliberación del metanol al aire samiéstense a la concentración de más fábriques d'estos mesmos productos nel puertu asturianu, polo que la Coordinadora pide que los espedientes d'impactu ambiental "tengan presente lo que yá ta instalao" y tamién les condiciones que se dan na contornada de los llugares au van desarrollase los proyectos.



La Coordinadora denuncia igualmente que los biocombustibles, lloñe de ser una solución pal problema de les emisiones contaminantes de los vehículos y la fin de los combustibles fósiles, tienen un procesu de producción llargu y abegosu que lleva a que se faigan más emisiones a l'atmósfera que les que teóricamente evitaríen, ello arriendes de que'l réxime de monocultivu de plantes como la palma supón un estrozu mediuambiental pa los países productores de la materia prima y caltién la dependencia enerxética de los consumidores. La coordinadora, qu'amás camienta que pa la producción d'estos combustibles utilizaríense plantes tresxénniques, denuncia que la etiqueta "biodiesel" ye falsa y que ye preciso priorizar el reciclaxe de los aceites vexetales y minerales qu'actualmente se tiren o quemen.