La Coordinadora Ecoloxista alega contra la recalificación de suelu en Cuideiru

La Coordinadora Ecoloxista d'Asturies acaba presentar alegaciones contra los proyectos de recalificación sometíos a información pública nel Conceyu de Cuideiru. Estos proyectos presentaos pol consistoriu favorecen, según la organización ecoloxista, "los pelotazos urbanísticos al clasificar como urbanizable tol suelu nel ámbitu de los núcleos rurales, colos derechos pero ensin los deberes y tramitación que comporta esta clase de suelu, y ta en contradicción colo dispuesto nel Art. 138 del Decretu Llexislativu 1/ 2004, de 22 d'abril".

En concreto les alegaciones refiérense a la modificación del parcelamientu rural y a la recalificación de terrenos en Villamar. Nel primer de los casos, la Coordinadora Ecoloxista afirma que "nun solo se pretende dende'l Conceyu reducir la superficie mínima necesaria pa la edificación de más d'una sola vivienda afitada nel Art. 427 de les Normes Urbanístiques. Faise a la vez desapaecer la figura urbanística de les Unidaes d'Actuación Directa contemplaes nos Arts. 431 y 432, sustituyéndose por parcelaciones d'ordenación conxunta sobre varies parceles que permitirá'l desarrollu d'urbanizaciones d'hasta 24 viviendes ensin les cesiones, ensin la información pública y l'autorización de la CUOTA que requieren les actuales Unidaes".

Nel casu de Villamar mencionen el conveniu de "Ciudad Jardín" en Villademar onde se quier realizar "una operación urbanística, que se presenta baxo la mázcara del interés xeneral y de la 'articulación, integración y cohesión social' la degradación y más que probable destrucción del Monumentu Natural de la Turbera de las Dueñas, declaráu Llugar d'Interés Comunitariu". Según la CEA "pretenden la clasificación como suelu urbanizable residencial d'una superficie de 119.590 m2 de terrén asitiao nel entornu inmediatu del Monumentu Natural de la Turbera de las Dueñas y del suelu de Protección de Costes, pa la construcción de 587 viviendes en promoción llibre, en bloques de 4 plantes, y un centru comercial".