La Coordinadora acusa a Coxersa d’engañar a la población pa xustificar la opción de la incineradora

Esti martes, Coxersa anunció l’encargu d’un ‘Plan ponte’ que proponga alternatives pal tratamientu de residuos a partir del 2015. La Coordinadora acusa al consorciu de tresmitir falsedaes a la población pa xustificar la incineradora.

La Comisión Delegada del Consorciu pa la Xestión de Residuos Solíldos d'Asturies (Coxersa), presidida pola conseyera de Fomentu, Ordenación del Territoriu y Mediu Ambiente, Isabel Marqués García, aprobó ayeri entamar los trámites pa la convocatoria pública inmediata del procedimientu de contratación d'una asistencia téunica pa la redaición d'un documentu de midíes alternatives pal tratamientu de residuos dométicos y asimilables a partir del 2015, fecha na que ta prevista l'acabación del actual vasu del Basureru Central d'Asturies. Según informó'l consorciu, el testu tendrá que contemplar un conxuntu de propuestes que valgan pa encarar la xestión de les 680.000 tonelaes de residuos non peligrosos qu'añalmente lleguen al depósitu controláu del valle de La Zorea (Serín). "Tales propuestes de transición tendrán que resultar eficientes mientres un intervalu de 3 a 5 años, esto ye, hasta qu'entren en funcionamientu les instalaciones definitives que contemple'l futuru Plan de Residuos del Principáu d'Asturies 2013-2020, pal que l'entamu de contratación aprobóse nel Conseyu de Gobiernu del pasáu 4 de xineru con un presupuestu tresañal de 99.946 euros y un periodu d'execución de trece meses", indica Coxersa.

Ente les opciones a estudiar pal tratamientu de los restos de residuos domésticos y asimilables a partir del 2015, alcuéntrase'l recrecíu del actual vasu de vertíu del depósitu La Zorea, la construcción d'un basereru de residuos non peligrosos nuevu próximu o alloñáu de les instalaciones de Coxersa en Serín, y hasta'l treslláu de les residuos fuera de la Comunidá Autónoma. Unes opciones que sorprenden a la Coordinadora Ecoloxista d’Asturies, que considera que’l consorciu ta tresmitiendo falsedaes “pa intentar xustificar la opción de la peligrosa y cara incineradora como la solución única. Se machaca a los ciudadanos con que’l basureru de residuos urbanos llega al so fin cuando se comprueba de forma cenciella qu’esto ye mentira: con una vista aérea de les instalaciones y la disposición de terrenos que tien Coxersa na so redolada, que-y permite dellos puntos de vertíos de los residuos en masa una vegada clasificaos, cosa qu’agora mesmu nun se fai”. N’especial, los ecoloxistes aseguren tar ablucaos cola propuesta de llevar basura a otres comunidaes autónomes.

D’igual forma, la Coordinadora recuerda de la esistencia d’otros munchos más basureros nel país y señala que lo que faen falta pa xestionar los residuos sólidos urbanos d’Asturies son “polítiques más actives de reducción, reutilización y reciclaxe”. Sobre la incineradora, los ecoloxistes consideren que la quema de basura “nun ye sólo la más peligrosa de les opciones de tratamientu de residuos, sinón la más cara pa los ciudadanos, la que menos emplegu xenera y la que destrúi les materies primes presentes nos residuos”, pa después resaltar “qu’amás de presentar un balance enerxéticu desfavorable precisa d’un basureru pa escories y cenices”.