"La convocatoria yá foi un ésitu poles conciencies que removió y los sofitos que tuvo", diz la XDLA

El coleutivu cívicu espera una respuesta importante de la sociedá asturiana na manifestación del sábadu pola oficialidá.

Hai una selmana les predicciones meteorolóxiques auguraben agua pa la xornada de mañana, pero hasta’l sol va facer actu de presencia na marcha ‘L’asturianu llingua oficial ¡agora!’ peles cais d’Uviéu, prevista pa les 12 hores de la Estación del Norte (RENFE). Una convocatoria que, visto los apoyos que vien sumando nes selmanes últimes, promete superar a aquelles masives del Pautu pol Autogobiernu y la Oficialidá del 1995 y 1998, y la tamién numberosa del Conceyu Abiertu pola Oficialidá (CAO) del 2005.

"La convocatoria yá foi un ésitu poles conciencies que removió y los sofitos que tuvo", espresa optimista a Asturies.com Xosé Candel, voceru de la Xunta pola Defensa de la Llingua Asturiana (XDLA). Partíos políticos, sindicatos, Plenos municipales y decenes de coleutivos sociales, clubes deportivos, grupos musicales o asociaciones d’estudiantes vienen amosando’l so compromisu pa cola oficialidá y faciendo llamamientu p’acudir a la convocatoria del coleutivu cívicu.

La participación d’una representación de la executiva de la FSA-PSOE ye la principal novedá con respeuto a les movilizaciones anteriores pola oficialidá. Podemos y Izquierda Xunida (IX), qu’anunció la presencia de Ramón Argüelles, Gaspar Llamazares y María José Miranda, sofitaron abiertamente la convocatoria, al igual qu’Andecha Astur, Izquierda Asturiana (IAS) y Alternativa Verde por Asturies-EQUO, ente otros.

Foro nun se pronunció entovía al respeuto, anque s’espera qu’ediles del partíu participen tres la pancarta de ‘Conceyos pola Oficialidá’. La convocatoria de mañana, al respeuto, tamién cuenta col sofitu de dellos Plenos municipales, en concretos los de Ḷḷena, Noreña y Carreño, llista a les que se sumó ayeri Avilés colos votos favoratibles de Somos Avilés, Ganemos Avilés en Común y IX; l’astención del PSOE; y los votos en contra de PP, Ciudadanos y los conceyales non adscritos.

Bloque mozu y feminista

Tamién son novedá nesta convocatoria l’entamu d’un bloque mozu y otru feminista pa participar na manifestación. El primeru va zarrar la marcha tres el sound system y axunta a coleutivos de mocedá y persones a títulu individual.

“Nun podemos quedanos de brazos cruzaos y ayenes a lo que ta asocediendo. Ta frayándose de forma sistemática por parte del Gobiernu del Principáu’l derechu a emplegar los nuesos propios idiomes, xenerando una situación de clara desigualdá (diglosia) na nuesa tierra y esbaratando el nuesu patrimoniu cultural inmaterial”, aseguren dendel Bloque Mozu pola Oficialidá, qu’anima a los más xóvenes a falar asturianu y gallego-asturiano nel so día a día “pa faeles resurdir”. “Queremos vivir nuna Asturies onde se respete y protexa la diversidá cultural y llingüística”, sentencien.

Pela so parte, el Bloque Feminista non Mestu pola Oficialidá pretente integrar a les feministes d’Asturies “porque la oficialidá tamién tien nome de muyer”. Ésti va dir nel llugar acutáu pa movimientos sociales.

Según la planificación fecha pola XDLA, una bandadona de gaites en Sib va abrir la manifestación, pa depués dar pasu a la cabecera de la marcha, la pancarta de ‘Reciella. Families pol Asturianu’ y sielles y carrichoches de críos, y el baberu pola oficialidá del gallego-asturiano. Darréu van dir les Pandereteres pola Oficialidá, los movimientos sociales, la bandona de gaites en Do, los ediles de Conceyos pola Oficialidá, les organizaciones sindicales y polítiques, el sound system y la batucada, y el Bloque Mozu pola Oficialidá.

“D’ésta va”

“N'Asturies tenemos dos llingües propies, l'asturianu y el gallego-asturiano, y los sos falantes nun tienen reconocíu llegalmente esi derechu. Si les nuestres llingües son como les demás llingües del Estáu, ¿por qué los sos falantes tienen menos derechos que los falantes d'otres comunidaes? Queremos el mesmu tratu institucional y el mesmu réxime de protección que tienen les demás llingües del Estáu”, demanda la XDLA nun comunicáu d’anuncia de la manifestación.

El coleutivu sigue calteniendo la so propuesta ‘Proyectu 2018 pola Oficialidá” pola que pretende entamar la reforma del Estatutu esti mesmu añu al entender que ye una cuestión namái de voluntá. “Nun mes podría facese”, recuerda Candel.

“Nun ye ético tener más tiempu esta situación indigna pal nuestru patrimoniu cultural: si somos conscientes de la situación de desigualdá nun se pue esperar más. Hai que reformar l'Estatutu d'Autonomía p'abrobar la oficialidá, un modelu xurídicu que podemos adaptar pa la situación asturiana. Na Xunta Xeneral hai una mayoría parllamentaria de partíos a favor de la oficialidá y ye'l momentu de poner remediu a un déficit democráticu que lleva demasiaes décades pendiente”, sigue’l comunicáu, que fina con un “d’ésta va”.