La convocatoria de los Premios Lliterarios presenta novedaes nel María Josefa Canellada

Yá tán convocaos tolos Premios Lliteriores y artísticos que vien entamando la Conseyería de Cultura, Política Llingüística y Deporte, polo que namái quedaríen por asoleyar les bases de los nuevos d’asturianada y guiones. Conoz equí les diferentes novedaes.

L’anuncia ayeri del XVI Premiu Camaretá al Meyor Cantar completa la nómina de gallardones entamada la selmana pasada: los ochos Premios Lliterarios y los dos artísticos. Una convocatoria que trai bases nueves pa los cinco ‘clásicos’, esto ye, el XLV Premiu Xosefa Xovellanos de novela, el XXX Premiu Xuan María Acebal de poesía, el XXX Premiu Máximo Fuertes Acevedo d’ensayu, XVII Premiu María Josefa Canellada de lliteratura infantil y xuvenil y el XVI Premiu Alfonso Iglesias de cómic.

El cambiu principal dase nel María Josefa Canellada, que va pasar a tar dedicáu cada edición a un públicu concretu. Asina, nesta ocasión van premiase obres pa un públicu infantil, independientemente de que se trate d’una propuesta pa prellectores, primeros llectores o rapacinos con habilidaes llectores.

Amás, tamién se convocaron el IV Premiu Florina Elías de traducción, el IV Premiu Enriqueta González Rubín de narrativa moza y el II Premiu Pachín de Melás de testos teatrales dientro los Premios Lliterarios. Los artísticos son el VIII Premiu Nel Amaro de Teatru Profesional n’Asturianu o Gallego-asturiano y pal XVI Premiu Camaretá al Meyor Cantar, pa temes asoleyaos nel 2023 y nestos primeros meses del 2024.

La recompensa pa caún de los gallardones ye de 6.000 euros, sacante’l Enriqueta González Rubín, qu’asciende a 3.000 euros. El plazu pa presentar candidatures fina’l día 26, el 2 de mayu nel casu del Camaretá al Meyor Cantar.