La convocatoria de fuelga de los sindicatos de Renfe y Adif afeutará a l’apertura de la variante de Payares

El trespasu de Rodalies, los trenes de cercanía catalanes, a la Generalitat qu’inclúi l’alcuerdu ente’l PSOE y ERC pal apoyu de la formación a la investidura de Pedro Sánchez lleva a los sindicatos a convocar paros de 24 hores pa los díes 24 y 30 de payares y 1, 4 y 5 d’avientu. El 30 ye cuando ta previsto l’apertura de la variante de Payares que permite la llegada de la velocidá alta a Asturies.

Los trabayadores consideren innegociables “que se caltenga la integridá de Renfe Operadora y de la rede d’infraestructures ferroviaries, y que se garanticen los derechos de los y les trabayadores, non sólo los económicos, sinón, tamién, los profesionales y de movilidá”, apuntaben dende’l Sector Federal Ferroviariu d’UXT. L’alcuerdu anunciáu afitaba la tresferencia del serviciu de Rodalies y dalguna posible infraestructura a Catalunya, pero entovía nun se conocen los detalles téunicos del trespasu de competencies.

Sicasí, los Comités Xenerales d’Empresa d’Adif y Renfe Operadora esixen garantíes y, por unanimidá de tolos sindicatos que los conformen, convoquen paros de 24 hores pa los díes 24 y 30 de payares y 1, 4 y 5 d’avientu. Quedaría por conocer los servicios mínimos que s’establezan, pero de nun haber alcuerdu ente’l Gobiernu en funciones y los trabayadores estes selmanes, la xornada d’apertura de la variante de Payares y la primer fin de selmana de llegada de la velocidá alta ferroviaria a Asturies, pa la que se vendieron cientos de billetes, quedaría afeutada.

Na semeya, un tren de prueba pasa pel túnel de la variante. Adif llanzó ayeri la llicitación del caltenimientu de les instalaciones de seguranza y proteición de los túneles, qu'inclúi'l preventivu y el correutiu en sistemes y elementos como la señalización y illuminación d'emerxencia, ventilación y proteición contra quemes.