La contaminación que nun se ve

Güei vienres 4 d'abril celébrase'l Día Mundial de la Contaminación Electromagnética, una fecha que pon de manifiestu un tipu de polución que suel llamar menos l'atención del públicu porque nun tien les manifestaciones escandaloses d'otros axentes contaminantes pero que cada vegada ta más presente y que ye un efectu cásique imposible de separtar de la sociedá de la comunicación. Les redes de corriente d'alta tensión ye ún de los axentes más importantes d'esta clase de contaminación, anque l'espardimientu de la telefonía móvil vieno a xuntar otru protagonista con más presencia, poniendo mui d'actualidá el tema dende va unos años p'acá

Les asociaciones ecoloxistes asturianes quieren aprovechar esta celebración pa llamar l'atención sobre delles reivindicaciones que camienten básiques pa echá-y el frenu a la saturación d'ondes eléctriques qu'acaben estragando'l mediu ambiente. Ente les reivindicaciones hailes d'acción sobre los axentes contaminantes como pidir l'enterramientu de les llinies d'alta tensión y que se faigan separtaes de núcleos de población, y tamién de tipu llegal, como pidir una llexislación adecuao que tape los furacos de la qu'hai agora y que reconoza la esistencia de riesgu sanitariu por esposición a la electropolución o que l'estáu y les compañíes faigan un seguru de responsabilidá civil sobre los daños que provoque la electropolución.