La construcción afuega Llanes

L'atractivu del oriente asturianu como destín turísticu y de segunda residencia y la construcción de nueves infraestructures na comarca tan provocando que la presión urbanística afuegue los sos conceyos con nuevos proyectos de colonies de xalés y urbanizaciones d'adosaos. El casu de Llanes quiciás seya'l más llamativu de toos, sobremanera agora que Llanes va estrenar un plan d'ordenación urbana atacáu de recalificaciones que camuden en suelu pa construyir lo qu'hasta agora yeren parroquies rurales.En dellos casos, les recalificaciones y proyectos d'urbanización amenacen con llevar per delantre llugares d'especial interés. Ye'l casu de La Talá, un cachiquín de costa ente Llanes y Poo, teóricamente al abellugu de la declaración de "Paisaxe Protexíu de la Costa Oriental" una declaración que queda en papel moyao énte'l "Plan Parcial de La Talá" una actuación consistente en mangar ellí una macrourbanización. Pa conocer La Talá encamentamos visitar esti web nel que s'esplica'l so valor y l'amenaza que supón el "Plan Parcial". Tamién paga la pena visitar el web de l'Agrupación de Vecinos y Amigos de Llanes, que ta llevando la oposición al PXOU que quier sacar alantre l'Ayuntamientu que dirixe Antonio Trevín.