La Constitución Europea algama un “Sí” marcáu pola abstención

Más de diez millones de votos dieron ayeri'l preste de la ciudadanía española al tratáu constitucional européu, contra 2,4 millones de votos negativos. Nel conxuntu del estáu el "Sí" consiguió'l 76,7% de los votos contra'l 17,2% del non y el 6% de votu en blanco. Sicasí, ello ha vese pasándolo pela peñera d'una participación mui baxa, y ye que namás pasó a votar el 42,3% del censu, 2,8 puntos menos que nes elecciones europees del 2004. El 57% d'abstención nel conxuntu d'España supón tamién l'abstención más alta rexistrada en nenguna consulta democrática d'ámbitu estatal dende la entrada de la democracia.

.

Cataluña (64,6% d'abstención) y Euskadi (62,6%) foron les comunidaes onde la tasa de participación foi más baxa que la media estatal, pero perbaxo d'esa media tuvo tamién Asturies, onde namás foi a votar el 38,96% del censu. Amás d'ello, el "non" algamó n'Asturies tamién un resultáu penriba de la media, raspiando la negativa al tratáu n'Asturies el 18%, siete décimes sobre la media, mientres que los votos al favor del tratáu n'Asturies quedaron nel 75,65%, un puntu perbaxo de la media.

Na viéspora del referéndum la Guardia Civil alcontró y desmanteló artefactos esplosivos de fabricación casero nes sedes del PSOE de Teberga y del PP de Llanera. Nel casu del PSOE teberganu, onde llegó a españar ún de los petardos qu'iguaben la bomba, alcontráronse nel llugar papeles con escritos contra los partíos mayoritarios y contra la Constitución Europea. Delegación del Gobiernu venceyó l'autoría d'estos ataques colos qu'asocedieron nel Día d'Asturies y con otros ataques a sedes de partíos políticos que vienen asocediendo n'Asturies dende va dos años p'acá.
Ver tolos resultaos por conceyos y autonomíes na web oficial de la consulta del Ministeriu