La Conseyería retira la llista d'interinos de llingua

El sindicatu d'enseñanza SUATEA denunció esta selmana que la Conseyería de Cultura y Educación, al través de la Dirección Xeneral de Recursos Humanos, ta faciendo desapaecer la especialidá y les llistes d'aspirantes a interinidaes pa impartir la docencia de llingua asturiana.

El sindicatu d'enseñantes tuvo accesu al proyectu de resolución que va regular la ellaboración de les nueves llistes de profesoráu interín que van valer a partir del cursu qu'entra y que van tener vixencia indefinida hasta que vuelvan a convocase otres oposiciones. Al dicir de la organización sindical, el testu ta estráu de novedaes que nun se negociaron colos sindicatos, como l'obligar al colectivu d'interinos a tirar por una sola especialidá, cola mengua de posibilidaes de trabayu qu'ello lleva arreyao.

La llectura que fai SUATEA del testu oficial pinta un futuru bien escuru pa la llingua asturiana nel sistema educativu. Ello ye que, en primer llugar, bien de profesores que lleven años dando l'asignatura podríen quedar ensin plaza, ello aparte de que la falta d'estabilidá nun va beneficiar la impartición de l'asignatura. En segundu llugar, la falta de profesoráu xeneraría una mala ijmaxe de l'asignatura, que diría asina perdiendo matriculación hasta quedar en trance de desaniciase por falta de demanda