Día del Llibru Asturianu

La Conseyería d'Educación confirma qu’adelanta un mes l’axudicación de places pa interinos

|
CP Álvaro Flórez Estrada

Los 3.000 interinos del sistema educativu asturianu, ente los que tán la mayor parte de los maestros de Llingua Asturiana y Gallego-Asturiano dada la inesistencia de la especialidá docente, van conocer los destinos un mes enantes de lo habitual. La Conseyería d’Educación confirmó que va axudicar les places el 31 de xunetu.

La norma venía siendo que’l profesoráu interín conociera’l centru nel que-y tocaba trabayar esi cursu a últimos d’agostu, en munches ocasiones poques hores enantes d’incorporase al puestu, lo que creaba problemes tanto a los docentes como a les propies direiciones. La Conseyería d’Educación da por fin una solución a esta situación, como confirmó Miguel Barón, direutor xeneral de Personal Docente, a les organizaciones sindicales na Xunta de Personal Docente que se celebró ayeri de manera virtual.

“Esti añu axudicaránse les places de centros educativos al personal interín con fecha 31 de xunetu, de forma que’l personal interín podrá conocer con esa fecha’l centru onde trabayará’l cursu que vien”, aseguró. Gracies a esti cambiu’l “personal interín podrá conocer con antelación suficiente’l centru onde s’incorporará’l 1 de setiembre”.

Educación calcula que 20.000 persones tán en disposición a pidir plaza n’Asturies, tando previsto pola conseyería’l repartu de 3.000. Los cerca de 350 docentes que dan clase de Llingua Asturiana y Gallego-asturiano son na so inmensa mayoría interinos –nel cursu 17-18 el porcentaxe foi 86,79 por cientu del total en Primaria y del 97,53 por cientu en Secundaria, según un informe de CC OO Enseñanza– énte la posibilidá d’optar a una plaza pola falta de reconocimientu de la especialidá, frenada anguaño por Madrid.

Tresllaos y evolución docente

Dende la conseyería informóse tamién que l’axudicación definitiva del concursu de tresllaos del personal docente va espublizase’l llunes n’Educastur. Mentes, la evolución de personal docente, que se venía faciendo en mayu, treslládase a xunu por mor de la situación actual por cuenta la pandemia de COVID-19, en concreto del día 9 al 27.

Na semeya, una clase del CP Álvaro Flórez Estrada, de La Pola Somiedu, nuna visita de la conseyera Carmen Suárez Suárez en marzu.

Contador Estadistiques