La Conseyería de Xusticia entama una campaña sobre la Constitución Europea

La Conseyería d'Esteriores y Xusticia estrena esti vienres la campaña informativa a los ciudadanos asturianos sobre'l referendum de la Constitución Europea, una cita pa la que falten trés meses. El primer preséu d'esta campaña ye una web informativa "constitucioneuropea.as" una páxina dende la que se presenten conteníos col asturianu por llingua de defectu, sobre la Carta Magna Europea, que tolos ciudadanos vamos tener que votar en referéndum esti mes de febreru.

Dende la Conseyería anúnciase que "la finalidá d'esti foru nun ye alitar el votu a favor o en contra del testu constitucional, sinón dotar a los navegantes de tou tipu d'informaciones útiles rellacionaes col Tratáu constitucional y col procesu de construcción europea y fomentar la so participación nel referéndum, nún u n'otru sen". Asina ye que la campaña institucional va retirase'l 5 de febreru, cuando entame la campaña electoral na que cada partíu políticu va pidir el votu al favor o en contra de la constitución. L'Español va ser el segundu estáu de la UE en pronunciase sobre la Constitución europea, dempués de Llituania, y ello tampoco nun ye casualidá, en cuantes qu'España ye ún de los estaos onde, de mano, hai un estáu d'opinión menos contrariu a l'aprobación de la carta, anque l'abstención pue emporcar el resultáu y les encuestes dicen que'l 40% de los españoles nun tienen conocimientu de qué ye la Constitución Europea.

El Gobiernu asturianu nun unvió copia n'asturianu de la Constitución cuando se fizo la firma oficial d'esta polos gobiernos de cada estáu miembru, pero xunta la web, la campaña va incluyir el repartu de llibretinos en castellanu y n'asturianu con un resume del testu constitucional y la traducción del testu enteru de la constitución al asturianu pa poder descargala dende la web, una traducción que, pol so volume y complexidá, va tardar hasta'l mes qu'entra.

Según esplicó'l Xefe de Gabinete Jorge Pardo, que definió la campaña como "modesta" en cuantes al gastu que va suponer (sobre 100.000 euros de presupuestu) "la esbilla d'artículos que van incluyise nel llibrín resumíu de la constitución que va entregase a los ciudadanos son los que definen los elementos fundamentales de los trés títulos qu'igüen la Constitución Europea". Pardo definió estos artículos como'l "núcleu" de la constitución y como "aquellos que xeneren más debate social y políticu".

Xunta ello, la Conseyería va entamar tamién una campaña de conferencies pa dar a conocer el testu, "garantizando la pluralidá de puntos de vista". Ente los ponentes van tar el secretariu d'Estáu d'Asuntos Europeos, Alberto Navarro, que va falar esti vienres n'Uviéu, y posiblemente'l presidente de la eurocámara Josep Borrell, mientres qu'una de les presencies más crítiques cola constitución europea va ser la del socialista francés Laurent Fabius.