La Conseyería de Salú fai'l primer cribáu con antíxenos nun conceyu

|
Tinéu

3.500 persones de 10 a 49 años tán convocaes pa facer la prueba en Tinéu. El miércoles rexistráronse 50 contaxos nel país.

L'alta incidencia acumulada a 7 díes, de 173,93 casos por cada 100.000 habitantes, lleva a la Conseyería de Salú a entamar el primer cribáu con antíxenos nun conceyu. Nel casu de dar positivu, al momentu comunícase-y al afeutáu pa que s'aislle y cítenlu pa facer una PCR que confirme'l positivu.

El llamamientu diríxese a unes 3.500 personas con tarxeta sanitaria na zona básica de salú de Tinéu, esto ye tol conceyu sacante Moure y Tamayanes, que tán incluyíos na d'Allande por cercanía. “La situación epidemiolóxica actual, mui diferente a la rexistrada meses pasaos, permite facer esti tipu de cribáu, que servirá pa comprobar l'estáu real del conceyu”, esplicó ayeri María José Gómez Castro, médica de familia y téunica de la Direición Xeneral de Salú Pública.

El cribáu principió esta mañana nel recintu ferial Santa Teresa de la capital. Les persones del llugar qu'entren dientro del tramu d'edá que quiera facer la prueba han de rellenar esti formulariu pa recibir cita.

Quinta xornada ensin muertes

A falta de la espublización de los datos oficiales, Salú comunicó la detección de 50 casos ayeri –l'actualización suma 1 casu más non contabilizáu'l martes–. Son 30 menos que'l martes, cuando se comunicaron 80.

El Serviciu de Salú del Principáu d'Asturies (SESPA) fixó 3.079 pruebes de diagnósticu d'infeición activa, polo que la tasa de positividá s'asitió nel 2,34 por cientu, inferior a la de la xornada anterior, cuando quedó nun 2,86 por cientu con 3.250 realizaos. A 7 díes, esti porcentaxe taba enantes de l'actualización nun 2,58 por cientu –ayeri baxó al 2,56 por cientu–.

Yá van cinco xornaes ensin muertes, lo que fai que'l total de finaos siga en 1.974. Hai hospitalizaes 56 persones con confirmación o sospecha de COVID-19 en planta y otres 28 tán na UCI, lo que significa 3 menos que'l día anterior entrambos casos.

Na semeya, Tinéu.

Contador Estadistiques