La conseyería de Mediu Ambiente entama un procesu sancionador contra los acampaos en Caliao

La Conseyería de Mediu Ambiente, Ordenación del Territoriu y Infraestructures, ta entamando a notificar a los participantes nel campamentu contra l''embalse de Caliao (Casu) un procedimientu sancionador. Según fontes de la Plataforma pola Defensa del Parque de Redes, que convocó la protesta pacífica contra la construcción del banzáu'l pasáu mes de setiembre, una docena de persones identificaes y denunciaes pola Guardia Civil "a petición del director Xeneral de Recursos Naturales Cristino Ruano".

L'acampada en Caliao, que formaba parte d'unes xornaes de sensibilización sobre la cultura del agua, tuvo llugar ente los díes 22 y 24 de setiembre del 2006. El mesmu día en qu'entamaba l'actividá, Mediu Ambiente declaró que se traba d'una actividá non permitida nel Parque de Redes, procediendo la Guardia Civil a identificar a los acampaos y asitiando controles na carretera que xube al pueblu casín.

La Plataforma pola Defensa de Redes presentó nel so momentu una denuncia nel xulgáu de Llaviana y una quexa énte la Procuradora Xeneral d'Asturies. Esta retrucó a los ecoloxistes que "nun hebo resolución alministrativa del Principáu d'Asturies que declarare prohibida l'acampada nin autorizándola"

La Plataforma pola Defensa del Parque de Redes valoró mui negativamente l'entamu del procesu sancionador, y declaró que tanto l'intentu d'impedir l'acampada como los espedientes sancionadores son "fechos graves qu'eseyen una política represiva contra los movimientos sociales y sindicales asturianos".