La Confederación Hidrográfica del Cantábricu activa la prealerta por sequía n’Asturies

La falta de lluvies n’ochobre y en gran parte de setiembre llevó a la Confederación Hidrográfica del Cantábricu (CHC) a activar, en fase de prealerta, el Plan Especial de Sequía n’Asturies. Lugo y Cantabria tán na mesma situación.
 
Tres tomar esta decisión, la CHC va treslladar una comunicación al respeuto a les alministraciones implicadaes; esto ye, ayuntamientos, comunidaes autónomes y organismos xestores d’abastecimientu d’agua. Pel momentu, l’activación del Plan Especial produzse nel nivel de prealerta, que lleva a informar a estos axentes de la necesidá de moderar el consumu d’agua ante la baxada de los caudales circulantes nos ríos a pesar de qu’éstos puedan suministrar tovía agua al sistema. D’esta forma, el CHC pretende garantizar la calidá nel agua de consumu y, al empar, respetar nos ríos un caudal suficiente pal mantenimientu de los ecosistemes.
 
Ente otres coses, la Confederación aconseya que se reduza l’usu del agua pa riegu de xardinos, baldéu de cais y restu d’usos non prioritarios, asina como aquelles otres midíes que s’estime puedan contribuyir al aforru. En paralelo, adviértese de la necesidá de reforzar los controles de calidá qu’utilicen nos sistemes de potabilización, dao que l’agua que se capte podría ver menguada la so calidá.