La comunidá irlandesa y l'asturiana hermánense en Nueva York

La ciudá de Nueva York foi testigu d'una gran acoyida a los emigrantes asturianos y a la representación del Gobiernu del Principáu, que fueron reconocíos como un miembru más dientro de la importante comunidá irlandesa en Nueva York. El momentu más emocionante de la xornada vivióse nel desfile del Día de San Patricio

Les Bandes de Gaites de Corvera d'Asturies y de Lluanco, los miembros del Centru Asturianu de Nueva York y la representación institucional del Gobiernu d'Asturies, encabezada pol Director de l'Axencia Asturiana d'Emigración, Luis Miguel Fernández Romero, protagonizaron ayeri xueves día 17 un desfile peles cais de Nueva York nel Dia de San Patricio. Ye la primera vez qu'una Banda de Gaites asturiana desfila en Nueva York, y pa ser la primer vez, les afinidaes culturales quedaron bien espeyaes a lo llargo'l desfile, nel que les gaites asturianes recibieron munchos aplausos d'un públicu sorprendío pol soníu de los nuestros instrumentos tradicionales, y polos cantares escoyíos ente los que taben "L'himnu a la Santina", "Dios bendiga América" y "Danny Boy".

Al pasu de la delegación asturiana per delantre de la tribuna presidencial, Mr. John Dunleavy, Manager Xeneral de la organización irlandesa, baxó del so escañu a saludar a la delegación asturiana. Mr. Dunleavy quitóse'l so sombreru y llevólu al corazón pa saludar emotivamente a los asturianos, que-y correspondieron tocando una de les más populares melodíes irlandeses, "Danny Boy".

Enantes del desfile, qu'entamó a mediudía y llegó al so fin a les 17 hores, celebróse una misa n'honor a San Patricio na catedral del mesmu nome. Los representantes asturianos (gobiernu, bandes de gaites y medios de comunicación), tuvieron presentes na ceremonia, xunta les autoridaes irlandeses organizadores del eventu. N'acabando la ceremonia'l cardenal irlando-americanu monseñor Egan saludó personalmente a Luis Miguel Fernández Romero, Director de l'Axencia d'Emigración, y a los representantes de la delegación y de los emigrantes asturianos en Nueva York.Ver semeyes d'esti viaxe (cortesía d'Aurelio Argel)