La comunidá asturiana en Suiza prepara’l so Día d’Asturies

La ciudá suiza de Lausanne va celebrar los díes 17 y 18 de setiembre una fiesta asturiana que va valir tamién de conmemoración de los venti años del centru asturianu del llugar. La fiesta va facese a la oriella del llagu Leman y tien por oxetivu allegar la cultura y tradiciones asturianes al públicu suizu.

La cantante de tonada Anabel Santiago, un grupu de baille tradicional de Bretaña y gaiteros d'Escocia, Galicia y Asturies van poner la música xunto col grupu folclóricu del centru, mientres que nel centru de la ciudá va asitiase una carpa con capacidá pa 500 persones na que va haber demostraciones d'artesanía asturiana y una representación d'artesanos del quesu del Conceyu de llanes. Una fabadona pa 400 persones, exhibiciones de deportes del país y otres actividaes complementaries igüen el programa d'esta cita que'l centru cuenta con repetir tolos años.


El centru asturianu de Lausanne asítiase en Crissier, un conceyu na redolada d'esta ciudá suiza que ye tamién sede del Comité Olímpicu. Anque nel so meyor momentu esti centru pasó de los 300 socios, anguaño tien poco más de cien, una baxada de filiación que s'esplica pol retornu a Asturies de munchos emigrantes en llegándo-yos el tiempu de la xubilación. El centru asturianu de Lausana cuenta con un grupu de baille que se conoz pol nome de "L'escarpín" y tuvo, hasta va pocos años, un equipu de fútbol propiu que xugó en competiciones de fútbol base suices .