La Comisión Europea da’l preste a la propuesta d’ArcelorMittal pa mercar a la italiana ILVA

ArcelorMittal pasa’l primer trámite pa facese cola empresa italiana ILVA. La Comisión Europea dio esti llunes el preste a la llista de desinversiones que propunxo’l xigante siderúrxicu, qu'afeuta a seis países y na que nun apaecía nenguna planta asturiana pese a que’l tren de chapa de Xixón yera favoritu pa tar nella.

Les factoríes qu’ArcelorMittal ha de vender son la única planta de producción d’aceru galvanizáu de la compañía n’Italia, asitiada en Piombino; la factoría de Galați (Rumanía); la de Skopje (Macedonia); la d’Ostrava (República Checa); la de Dudelange (Luxemburgu); y, en Bélxica, les llinies de galvanizáu por inmersión en caliente 4 y 5 en Flémåle, y les instalaciones de llaminación en caliente, decapáu, llaminación en frío y lata en Tileu. Namái d’esta forma va poder siguir cola operación de concentración presentada por AM Investco Italy Srl (AM Investco), consorciu lideráu por ArcelorMittal, pa l’adquisición d’ILVA.

La intención de la empresa ye facer esta desinversión de la manera más breve posible pa consolidase como la siderurxa más importante d’Europa. Sicasí, ha d’avanzar de manera paralela na negociación col Gobiernu d’Italia, anguaño propietaria d’ILVA, y colos sindicatos, que refuguen el plan d’emplegu que presenta ArcelorMittal y que dexaría na cai a 4.000 emplegaos.

Na imaxe planta d'ILVA en Novi Ligure. Semeya propiedá de Gruppo ILVA.