La Comisión Direutiva de Foro que sal del Congresu noma a Pumares candidatu nes eleiciones de mayu

|
Comisión Direutiva de Foro 2022

Esti sábadu celebróse'l V Congresu Ordinariu de Foro, nel que Carmen Moriyón renovó’l cargu de presidenta y Adrián Pumares el de secretariu xeneral. La Comisión Direutiva nueva adoptó darréu la decisión de nomar al de Llaviana como candidatu a la Presidencia del páis.

Col mensaxe de ‘Asturias, lo primero’, Foro abrió una etapa nueva na que Moriyón y Pumares, responsables de liderar un duru procesu de renovación interna y rotura col pasáu, siguen al volante. La so candidatura foi la única presentada, polo que los dos salieron reescoyíos nel actu desendolcáu nel Palaciu d’Esposiciones y Congresos d’Uviéu.

“Los dos grandes partíos de Madrid nun pueden ufrir nada a Asturies, más que recetes reciclaes y discursos de cartón-piedra. Por eso, mientres les grandes formaciones dedíquense a gobernar dende Madrid, les comunidaes como’l Principáu d’Asturies caen na irrelevancia. Ye mui duro dicilo asina, pero ye la realidá. Énte eso, tenemos que sublevanos y construyir esa alternativa. Nós, dende Foro, ufrímonos a la sociedá asturiana pa ser parte de la solución”, espresó Moriyón na so intervención.

Llueu del Congresu, la Comisión Direutia celebró un aconceyamientu nel qu’escoyó a Pumares como candidatu de Foro a la Presidencia nes eleiciones de mayu. Enantes, Moriyón anunciáralo nel so discursu: “Tengo tanta confianza n’Adrián que nun m’entra la más mínima dulda de qu’él ye’l qu’ha encabezar esa candidatura, yá me lo sentisteis munches veces. Pol so trabayu, pol so perfil, pola so forma de ser. Adrián merez ponese yá manes a la obra pa conformar esi equipu ganador y sabe que va a atopar, na Comisión Direutiva y nesta Presidenta, tol apoyu que pueda necesitar”.

Na semeya, miembros de la Comisión Direutiva nueva de Foro, con Pumares cuartu pela izquierda na primer filera, a la derecha de Moriyón.

Contador Estadistiques