La Comarca de la sidra tien abiertu’l plazu pal Concursu de Cómic n’asturianu

La baxa participación d'ediciones anteriores llevó a l organización a enanchar el plazu pa presentar trabayos a esti concursu, que ta abiertu hasta'l 30 de payares, lo mesmo pa la categoría d'adultos que pal concursu d'escolinos

En cualquier casu, pa la modalidá de mayores de 14 años, que tien un primer premiu de 500 euros y 2 segundos de 200, la presentación de les obres va poder facese de forma individual o conxunta ente un guionista y un dibuxante o por un equipu de trabayu, presentándose los orixinales en formatu DIN A-4 tanto en blancu y negru como a color y ensin topes d'estensión. Los trabayos han entregase nes oficines de la Mancomunidá de la Comarca de la Sidra na Cai Escueles de Paraes, s/n 33529 - Nava, o bien nes Oficines d'Información Xuvenil de la Comarca, Cai La Laguna, baxos 33520 de Nava y na Casa de Cultura de Villaviciosa. Han presentase nun sobre cerráu que nel so interior recueya los datos personales: nome y apellíos, direición, teléfonu, títulu y seudónimu, y copia del D.N.I. o tarxeta residente.

Otramiente, los escolinos d'hasta 14 años puen presentase al concursu de tira cómica, que tien de tener una estensión mínima de cuatro viñetes, presentando cada participante un máximu de tres tires. Los orixinales tienen de presentase sobre papel, formatu DIN A-4 o foliu, y como firma apurrir un seudónimu que tien qu'apaecer tamién nel esterior d'un
sobre onde dientro han incluíse los datos de nome y apellíos, edá, cursu y centru educativu. Los premios nesta estaya consisten en material educativu y d'entretenimientu pa les categoríes de Primer y Segundu Ciclu d'Educación Infantil, Tercer Ciclu d'Edición Infantil
Primer Ciclu d'Educación Secundaria y Segundu Ciclu d'Educación Secundaria.

Delles obres selecionaes van formar parte d'una esposición itinerante polos diferentes
centros culturales de la Comarca la Sidra. Nel mesmu sen, la organización va editar una
publicación coles obres premiaes. Finada la esposición, nel mes de marzu de 2006, los
trabayos van ser devueltos a los autores que lo soliciten.