La Comarca de la Sidra convoca'l so concursu de cómic n'asturianu

La Mancomunidá Comarca de la Sidra, na que s'inxeren los conceyos de Bimenes, Cabranes, Colunga, Nava, Sariegu y Villaviciosa, per aciu de los sos servicios de Mocedá y Normalización Llingüística convoca la quinta edición del Concursu de Cómic N'asturianu.


El concursu inxértase dientro'l programa de promoción artística "Creación" y d'una manera tresversal en Programa de Normalización del usu del Asturianu de la Mancomunidá de la Comarca la Sidra, empobináu a la mocedá, al ser el cómic una espresión artística cercana al llector mozu.

Depués de les cuatro ediciones anteriores onde se vieron trabayos "de calidá estraordinario" al dicir de la organización, la convocatoria d'esti añu respuende a los mesmos criterios: escritos n'asturianu, temática llibre, autores mayores de 14 años de cualesquier orixe y unos premios que van de los 200 euros de los dos accésit al premiu primeru de 500 euros, amás del espublizamientu de les meyores histories presentaes.



El concursu incluye una categoría paralela d'ellaboración de Tires Cómiques empobinada a escolinos/es d'enseñanza primaria y secundaria de los distintos centros educativos de la Comarca de la Sidra, onde los participantes tienen d'ellaborar una tira con una estensión máxima de cinco viñetes. Nesti casu los premios van ser de material didáuticu, deportivu y d'esparcimientu pa los tres meyores trabayos de les distintes modalidaes, qu'estremen ente primeru y segundu ciclu d'educación Primaria per un llau, tercer ciclu de primaria per otru y otres dos categoríes pa los dos ciclos de Secundaria

El plazu de presentación de los trabayos tanto na categoría de Cómic pa mayores de 14 años, como la de Tires Cómiques pa escolinos/es, acaba'l 15 de payares, y como ye vezu, toles obres presentaes van formar parte d'una esposición itinerante pelos diferentes centros culturales de la Comarca de la Sidra, asina como por dellos espacios culturales asturianos.