La collecha mundial de tresxénicos medró un 20%

La collecha mundial de tresxénicos xubió un 20% nel añu 2004 según los datos oficiales acabantes d'asoleyar pola institución americana ISAAA, patrocinada pol Rockefeller Institute y qu'estudia l'espardimientu de les nueves biotecnoloxíes nel mundu. Según l'informe del ISAAA l'área del suelu mundial dedicao a los tresxénicos foi nel 2004 de 81 millones d'hectárees, y son yá más d'ocho millones d'agricultores en 17 estaos los que semen material modificao xenéticamente, llamando muncho l'informe de la institución americana sobre'l fechu de que foron los países más probes y, dientro d'estos, los pequeños agricultores, los que más contribuyeron a enanchar la "güerta tresxénica" mundial, dalgo que lleva a concluyir al ISAAA que los países en desarrollu son los que más van beneficiase del espardimientu de los tresxénicos y del beneficiu comercial qu'aporten al productor. Les previsiones del ISAAA, que celebra que la UE aplicare dende esti añu una política menos dicen que pa n'acabando la presente década, más de 15 millones d'agricultores nel mundu van dedicase al cultivu de tresxénicos en 150 millones d'hectárees per tol mundu. L'ISAA tamién se congracia de la entrada d'España al grupu de los grandes productores mundiales de tresxénicos, nel qu'anguaño hai 14 estaos del planeta que-yos dediquen a estos vexetales un mínimu de 50.000 hectárees.

Estos datos nun se ven con tantu optimismu dende'l bandu conservacionista, qu'insiste en los peligros de los alimentos modificaos xenéticamente como portadores de riesgos reales pa la salú como reacciones d'alerxa y desequilibrios nutritivos, ello amás d'otros riesgos potenciales como'l saltu de xenes resistentes a antibióticos a les bacteries del intestín. Amás d'esto, los grupos ecoloxistes concueyen toos nel argumentu de que la xuba de producción mundial d'alimentos que puen apurrir los tresxénicos nun ye necesaria en cuantes que l'agricultura mundial yá produz ensin falta d'ellos más alimentos de los que precisa la humanidá.

L'añu pasáu l'alarma sobre los tresxénicos saltaba n'Asturies al conocese de la esistencia d'una faza de seis hectárees plantada de maíz tresxénico, un datu que destaparon los grupos ecoloxistes y del que'lGobiernu asturianu nun tenía conocimientu. Puestos en contactu con Fructuoso Pontigo de la Coordinadora Ecoloxista d'asturies, el conocíu militante ecoloxista comentó a Asturies.com que la so organización nun tien "conocimientu exactu de cuanta superficie pudo dedicase-yos nel 2004 al cultivu de tresxénicos n'Asturies", anque, según esplicó, "sabemos que dalgo pue haber pa la parte de Ribedeva, onde yá se punxo maíz BT l'añu 2003". Con too y con ello, la mayor amenaza de la presencia de tresxénicos n'Asturies nun vien, según Pontigo, de la esistencia de plantaciones d'ello, y ye que "l'auténticu peligru ta viniendo de la entrada incontrolada de piensos pal ganáu ellaboraos con cereales tresxénicos que dempués el consumidor va acabar tomando vía lleche ensin sabelo". Militantes de la Coordinadora Ecoloxista tuvieron ocasión de comprobar como tan entrando estos piensos en mercáu na última feria ganadera Agropec en Xixón, una de les mayores esposiciones de ganáu del país y na que "los sacos de piensu tresxénico que llevaron munches ganaderíes pa dar de comer a les vaques na feria taben a la vista de cualquiera que pasare per ellí"