La collecha de sidra DOP del 2011 ye la mayor de la historia de la marca

El Conseyu Regulador de Sidra de Denominación d’Orixe Protexida ‘Sidra d’Asturies’ dio a conocer esti martes los datos de la collecha del 2011. L’añu pasáu recoyéronse 2.473.681 quilos de mazana, la cifra más alta de la historia de la marca.

El 2011 foi un añu mui positivu pa la sidra fecha con variedaes de mazana autóctona incluyíes na llista de la DOP, yá qu’aumentó’l númberu d’hectarees cultivaes y el d’ellaboradores tres la incorporación de Sidra Vallina (Villaviciosa) y Llagar La Morena (Siero), pa sumar un total de 27. A l’aumentu de la collecha, amás de la medra de la superficie de pumaraes con variedaes DOP (un total de 592), tamién influyó que fora añu impar yá que, pola vecería, éstos son de mayor producción que los pares. Asina, de los 1.389.703 quilos de mazana del 2010,  pasóse a 2.473.681. Mentes, nel 2009, la producción total foi de 2.218.173 quilos.

L’añu pasáu tamién destacó pol aumentu del númberu de contraetiquetes de Denominación d’Orixe entregaes, al pasar del 1.334.500 del 2010 a 1.381.000. En númberu de llitros, nel 2011 produciéronse 1.856.700 por 1.043.747 del añu anterior.